I konsideruar si një njeri me lidhje të forta politike në Shqipëri, Klement Balili u përfol fillimisht nga mediat greke, por pa ia përmendur emrin.
Rreth tre vite më parë, CNN grek në një shkrim, shprehej se “Baroni i kartelit të drogës në Ballkan po mbrohet nga politika në Tiranë”, si dhe theksonte pafuqinë e policisë shqiptare për ta arrestuar.
Po në vitin 2016, Partia Demokratike deklaroi zyrtarisht se ky person, që i referohej Athina, është Klemend Balili, të cilin e ka denoncuar edhe në maj të vitit 2014 kur u emërua si drejtor i Transportit në Sarandë.
Edhe pse në deklaratën e PD-së flitej vetëm për lidhje të Balilit me ish-ministrin Saimir Tahiri dhe drejtues të lartë të Policisë së Shtetit, lidhjet e tij politike janë më të fuqishme në radhët e LSI-së.
Nipi i Klemend Balilit, Rigels Balili ishte kryebashkiak i Delvinës i propozuar nga LSI-ja. Pushteti i tyre ekonomik dhe influenca e madhe në jug të vendit, e ndihmoi LSI-në të rriste rezultatin e saj elektoral në Sarandë, Delvinë e Vlorë.
Prej vitesh Klemend Balili ishte drejtor i Transportit të Sarandë. Verën e vitit 2015 në qytetin bregdetar u inagurua kompleksi turistik “Santa Quaranta”, në pronësi të vëllezërve Balili.
Në këtë inagurim merrte pjesë Ilir Meta, ish-deputeti Koço Kokëdhima dhe zyrtarë të tjerë politikë.
Ish-kampi i punëtorëve në Sarandë u shndërrua në një kompleks modern pas investimit të vëllezërve Balili. Në pronësi të tyre është gjithashtu edhe Hotel “Olivia” në bregdetin e Butrinit, një tjetër resort i njohur i zonës.
Klemend Balili bashkë me vëllezërit e tij zotëron gjithashtu edhe kompaninë e sigurimit “Balili Sh.p.K” e cila operon në qarkun e Vlorës, si dhe shoqërinë e transportit të udhëtarëve drejt Greqisë “Maksa Travel”.
Në vitin 2006 Klemend Balili u arrestua bashkë me disa persona të tjerë të përfshirë në trafikun e drogës. Ndërkohë nga autoritetet shqiptare, deri më tani ka folur policia, e cila nuk dha shumë detaje e aq më pak emra, por thjesht raportoi se operacioni po vijon.
Policia greke ka thënë se droga kalonte nga Shqipëria drejt Greqisë dhe më pas në vende të tjera të Europës.
“Pablo Escobari” nga Saranda, raportojnë mediat greke, ka lidhje të forta politike në Shqipëri si dhe është një prej financuesve të një partie opozitare greke.
/javanews/a.rada
