Ervin Mata është një nga emrat më të njohur nga drejtësia shqiptare, i cili ishte shpallur në kërkim. Arratia e tij mori fund teksa është vendosur në pranga nga autoritetet braziliane.
39-vjeçari, i cili fshihej në Brazil me dokumente false është një nga personat më të kërkuar nga drejtësia shqiptare dhe ajo ndërkombëtare, akuzohet nga Prokuroria e Posaçme Kundër Korrupsionit dhe Krimit të Organizuar për pjesëmarrje në një grup kriminal të strukturuar, trafik ndërkombëtar droge, kryesisht kokainë dhe pastrim parash.
Profili i tij publik lidhet me biznesin, lidhje me botën e showbizit dhe një histori të gjatë me drejtësinë.
Ervin Mata është i njohur edhe si biznesmen në fushën e pronave të paluajtshme, hotelerisë dhe investimeve.
Shumë nga bizneset e tij janë regjistruar zyrtarisht në emër të babait të tij, Luan Mata, ose anëtarëve të tjerë të familjes, ndërsa SPAK i ka hetuar këto prona si produkte të pastrimit të parave nga trafiku i kokainës.
Ngjarja në Ish-Bllok
Më 4 tetor 2018, në një nga lokalet e zonën së ish-Bllokut në Tiranë, ndodhi një përplasje me armë midis grupeve rivale.
Ervin Mata u akuzua se ishte në qendër të konfliktit me Ervis Martinajn, i cili rezulton i zhdukur. Në këtë ngjarje mbeti i vrarë truproja i Martinajt, Fabjol Gaxha, ndërsa Martinaj dhe Eljon Hato u plagosën.
Konflikti dyshohej se lidhej me një ngarkesë kokaine të kartelit Bello. Mata u arratis për rreth 5-6 muaj, dhe më pas vetëdorëzua në prill 2019. Ai u la i lirë nga gjykata dhe më vonë u lirua nga akuzat për atë ngjarje edhe pse prokuroria e apeloi vendimin.
Akuzat e SPAK-ut
Në nëntor të vitit 2023, SPAK lëshoi urdhërarrestin ndërkombëtar për Ervin Matën si pjesë e një grupi kriminal të strukturuar që operonte në trafikun e kokainës nga Amerika Latine si Brazili, Bolivia, Kolumbia drejt Europës, në vende si Gjermania, Holanda dhe Spanja.
Mata dyshohet për dërgesa të mëdha kokaine, përfshirë një ngarkesë prej 240 kg të kapur në Frankfurt, të Gjermanisë dhe pjesë e konfiskimeve më të mëdha si 446 kg në Holandë dhe 69 kg në Brazil.
Akuzat shtrihen edhe në mbështetje të elementëve korruptivë në polici si dhe te planifikimi i vrasjeve dhe bashkëpunim me anëtarë të tjerë të grupit.
SPAK ka hetuar edhe rreth 40 persona të afërm të tij për lidhje me grupin.
Ervin Mata ishte shpallur në kërkim ndërkombëtar, kur më 11 mars të vitit 2025, Gjykata Supreme Federale e Brazilit lëshoi një urdhër-arrest për të, me kërkesë të Shqipërisë për ekstradimin e tij.
Urdhri u bë i ditur më 23 shtator të vitit 2025 për t’u finalizuar ditën e sotme kur ai u vendos në pranga nga autoritetet e Brazilit dhe më pas pritet ekstradimi i tij në Shqipëri.
Ervin Mata cilësohet si një nga figurat e spikatura në hetimet e SPAK-ut për trafikun ndërkombëtar të drogës dhe krimin e organizuar në Shqipëri.
