Një 32-vjeçar u ekzekutua me armë zjarri në Maqellarë të Dibrës. Ngjarja e rëndë ndodhi pak pas mesnatës dhe sipas policisë, viktima është Elsi Kosiqi, i cili u gjet i pajetë në oborrin e banesës.
Nga të dhënat e para, thuhet se Kosiqi sapo ishte kthyer nga Maqedonia, kishte parkuar makinën dhe po mbyllte portën e shtëpisë. Në atë moment, autori e qëlloi dhe e la të vdekur në vend.
Policia ka shoqëruar disa persona, midis tyre edhe nga ata që ishin në konflikt me viktimën. Por ende nuk ka një të dyshuar për krimin.
Në zonë janë ngritur pika kontrolli, kurse në vendin e ngjarjes u sekuestruan prova që mund të çojnë në zbardhjen e ngjarjes.
Burimet policore thonë se Elsi Kosiqi kishte jetuar për shumë vite në Itali dhe me paratë e emigracionit, bashkë me vëllezërit kishin ngritur së fundmi një hotel në zonën e llixhave në Dibër.
/a.m.
