Ky është 30-vjeçari Romeo Hasalla i cili mbeti i vrarë mëngjesin e së enjtes nga kushërinjtë e tij pas një konflikti pronësie në Garunjas të Lushnjes.
Ishte ora 6 e 30 e mëngjesit të së enjtes kur Romeo bashkë me dy vëllezërit dhe babain e tij kishin shkuar në tokat e tyre për të punuar me traktor. Aty kanë gjetur dy kushërinjtë e tyre, vëllezërit Kastriot dhe Afrim Hasalla, të cilët kishin vetëm dy ditë që ishin kthyer nga Italia.
Pasi kanë debatuar fillimisht në mënyrë verbale, situata ka dalë jashtë kontrollit dhe Kastriot Hasalla dyshohet se ka gjuajtur me çifte në drejtim të kushërinjve të tij.
Për pasojë ka mbetur i vrarë në vend Romeo Hasalla, ndërsa është lënduar babai i tij Shaip Hasalla 65 vjeç dhe dy vëllezërit Emiljano dhe Laert Hasalla 31 vjeç.
Ata kanë shkuar vetë me makinë në spitalin e Lushnjes për ndihmë mjekësore dhe janë jashtë rrezikut për jetën.
E tronditur, nëna e viktimës tregon se mosmarrëveshjet lindën për tokën.
“Ajo është tokë shtet, çunat e patën mbjellë, ata thonë është toka ime, vajtën atje, nuk di nona gjë më, për punë toke i raftë zjarri”.
Vëllezërit Kastriot dhe Afrim Hasalla menjëherë pas kryerjes së krimit janë larguar nga vendi i ngjarjes.
Ata janë shpallur në kërkim nga policia e cila ka sekuestruar edhe armën e krimit.
/a.r
