Kryeministri Albin Kurti deklaroi se pasdite do të vazhdojnë përpjekjet për të zgjedhur Presidentin.
“Urojmë e besojmë e shpresojmë edhe për një kandidaturë të dytë në mënyrë që ta përmbushim kërkesën kushtetuese për garë”, tha Kurti pas mbledhjes solemne te Qeverisë në nderim të 28-vjetorit të Epopesë së UÇK-së dhe para fillimit të seancës plenare e ftuar për këtë qëllim.
Kuvendi ka kohë deri në mesnatë për të zgjedhur presidentin e ri. Ndërsa kandidati për President Glauk Konjufca deklaroi se ka qenë vendim i Lëvizjes Vetëvendosje që të kandidohet ai.
Konjufca kërkoi nga opozita që të propozojnë edhe ata dikë që sipas tij nëse do të ishte më i mirë do ta votonte edhe ai. “Nëse ata propozojnë ndonjë emër, ndoshta edhe unë do ta votoja. Por askush nuk po propozon. Jam shumë kureshtar të di kush është ai që do ta votonin nëse nuk jam unë”, tha Konjufca, duke shtuar se opozita mund të propozojë edhe presidenten aktuale Vjosa Osmani.
