“Serbia duhet të sanksionohet e ndëshkohet ndërkombëtarisht. Nëse kalon pa ndëshkuar do përsërisë krimin”. Këtë apel lëshoi nga foltorja e Kuvendit kryeministri i Kosovës Albin Kurti, teksa foli për sulmin e 24 shtatorit në Banjskë të Zveçanit. Sipas tij “armatimi ushtarak dhe trajnimet luftarake që kishin profesionistët serbë që sulmuan të dielën janë të gjitha nga Serbia dhe të freskëta në kohë”.
“Armatimi i konfiskuar është i Serbisë, erdhi nga Serbia dhe ishte për një ushtri të tërë dhe fajësimi i Serbisë është i paevitueshëm edhe për ata që nuk duan të shohin dhe të dëgjojnë”.
Ai kërkoi nga vendet mike dhe partnere që të shpallin organizata terroriste, organizatat “Mbrojtja Civile” dhe “Brigada Verore”.
“Organizatat “Mbrojtja Civile” dhe “Brigada Verore” duhet të shpallen organizata terroriste edhe nga shtete tona mike partnere aleate ashtu siç bëri qeveria e Kosovës më 29 qershor sivjet”.
Duke e cilësuar sulmin e së dielës terrorist dhe kriminal Kurti kërkoi që të dorëzohen në organet e Kosovës sulmuesit që u larguan.
“Të dielën në Banjskë kishte sulm terrorist e kriminal që cenoi integritetin territorial dhe sigurinë kombëtare. Sulmuesit që arritën të ikin duhet të dorëzohen në organet e Republikës së Kosovës.
Ai solli në vëmendje sulmin ku humbi jetën rreshteri Afrim Bunjaku në Banjskë, dhe theksoi se ishte një ditë e rëndë për kombin, por grupet kriminale e terroriste sipas tij nuk kanë shanse me Policinë e Kosovës.
“Të dielën e 24 shtatorit përjetuam një sulm agresor të bandave terroriste të Serbisë, jo vetëm ndaj policisë, por ndaj shtetit, Republikës, rendit e sigurisë sonë. Sulmi i orkestruar i bandave terroriste vrau rreshterin tonë dhe plagosi një tjetër. Ishte një ditë e rëndë për kombin tonë. Policisë së Kosovës do t’i mungojë një pjesëtar i përkushtuar sikurse familjes e shoqërisë sonë . Vrasja e tij u kthye në angazhim më të shtuar në luftimin e bandave terroriste dhe fitore të betejës nga policia e Kosovës. Terroristët ose janë vrarë, arrestuar, ose janë në ndjekje. Afrim Bunjaku është heroi më i ri i Kosovës. I vetmi polic që u vra në këtë ballafaqim ishte ai që u vra në pritë. Me të zbardhur drita u pa se grupet kriminale e terroriste nuk kanë shanse me Policinë e Kosovës.”/f.s
