Të hënën e 16 tetorit, Tirana do të presë mysafirët Perëndimorë në kuadër të samitit Procesit të Berlinit, i cili për herë të parë do të mbahet jashtë kufijve të Bashkimit Evropian. Për 24 orë, kryeqyteti do të jetë i mbushur me një axhendë të ngjeshur deri në orën 19:30.
Kryeministri i Kosovës, Albin Kurti e ka konfirmuar se do të vizitojë Tiranën më 16 tetor. Prezenca e tij në kryeqytetin e Shqipërisë lidhet pikerisht me pjesëmarrjen në Samit.
Në këtë mënyrë, Kurti i përgjigjet pozitivisht ftesës së kryeministrit Rama për t’iu bashkuar liderëve europianë në këtë mbledhje të organizuar nga vetë ai.
Më herët, Kurti nuk mori pjesë në këtë mbledhje të organizuar nga Rama, ndërsa ia delegoi pjesëmarrjen ministres së Jashtme, Donika Gërvallës.
Ndërkohë mediat kanë siguruar axhendën e samitit të Procesit të Berlinit ku do të marrin pjesë liderë botërorë si dhe përfaqësues të BE-së.
Samiti, i cili do të jetë i ndarë në dy sesione do të çelet më datë 16 tetor në orën 11:00 ku do të nisë pritja zyrtare e liderëve botërorë. Fjalën hapëse të samitit të Procesit të Berlinit do e nisë kryeministri Rama, kancelari gjerman Olaf Scholz, Presidentja e KE-së, Von der Leyen dhe Presidenti i Këshillit Evropian, Charles Michel.
/a.r
