Situata në pjesën veriore të Kosovës vijon të jetë e qetë, por e brishtë. Gazetarja Blerta Dalloshi Berisha, në një lidhje direkte me edicionin e lajmeve në Tv Klan nga Bërnjaku tha se barrikadat vijojnë të jenë ende aty.
“Ende vazhdojnë të jenë barrikadat këtu ku gjendemi, në rrugën që të çon për në Bërnjak. Edhe në Jarinjë, ishim pak më herët, rruga për atje vazhdonte të ishte e mbyllur. Megjithatë në 24 orët e fundit mund të them lirisht që situata është më e qetë”.
Gazetarja mëson se KFOR vijon negociatat me serbët lokalë, për heqjen e barrikadave.
“Kryeministri Kurti ka kërkuar ndihmën e KFOR, po Tv Klan ka mësuar se KFOR është duke vazhduar negociatat me serbët lokalë që ata vetë që t’i heqin barrikadat. Gjatë ditës së sotme në Serbi pritet të qëndrojnë këshilltarë të presidentit të Francës dhe Gjermanisë, për të diskutuar këtë çështje edhe me presidentin e Serbisë, Aleksandër Vuçiç. Ndërsa në Kosovë gjendet ende Gabriel Escobar, i cili gjatë ditës së sotme është takuar edhe me opozitën, por mbrëmë edhe me përfaqësues të Listës Serbe, të cilët ishin shumë të shkurtër në komunikatën e tyre, kur njoftuan se janë takuar me të dërguarin e SHBA, për Ballkanin Perëndimor”.
Pikërisht për këtë çështje, gjatë ditës së nesërme do të qëndrojë në Kosovë dhe Serbi edhe i dërguari i BE, për dialogun Miroslav Lajçak.
/s.f
