Një kurorë me lule, simbol mortor, është vendosur në derën e shtëpisë së prindërve të Emiljano Nikës, drejtor i Inspektoratit Kombëtar të Mbrojtjes së Territorit (IKMT) në Shkodër. Ngjarja ka ndodhur më 18 korrik 2025 në fshatin Sektor të Velipojës dhe është denoncuar menjëherë në polici si një akt kërcënimi.
Emiljano Nika ka luajtur rol kyç në aksionin për prishjen e ndërtimeve pa leje në zonën e mbrojtur të Thethit, ku është përballur me kundërshtime nga banorët lokalë. Dyshohet se vendosja e kurorës është një paralajmërim i drejtuar ndaj tij pas këtij aksioni.
Në njoftimin e Policisë thuhet se po punohet për sqarimin e rrethanave të ngjarjes, si dhe për identifikimin dhe kapjen e autorit. Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.
Policia njofton gjithashtu se Nika është kërcënuar edhe më parë për shkak të detyrës së tij dhe se po vijojnë hetimet për të garantuar sigurinë e tij dhe për të zbuluar autorët e kërcënimeve.
