Prokuroria e Posaçme në bashkëpunim me autoritetet zvicerane, ka goditur një rrjet të strukturuar kriminal që merrej me trafik droge, pastrim parash dhe krijimin e një sistemi informal të transferimit të miliona eurove të përfituara nga aktivitetet e jashtëligjshme, nga Zvicra drejt Shqipërisë.
Sipas SPAK, tre personat nën hetim, me inicialet E.F, B.F dhe P.K, në bashkëpunim me persona të tjerë rezidentë në Luzern të Zvicrës, kanë organizuar dhe operuar për vite me radhë një sistem informal transferimi parash, i njohur si “Hawala”.
Kjo skemë ka funksionuar që nga viti 2020 dhe është përdorur për të transferuar miliona euro nga Zvicra në Shqipëri, të ardhura nga aktiviteti i paligjshëm i trafikimit dhe shitjes së drogës në territorin zviceran dhe më gjerë.
Sipas skemës së përdorur, personat e interesuar për të transferuar paratë me burim kriminal i dorëzonin ato te bashkëpunëtorët e grupit në Zvicër. Këta të fundit njoftonin menjëherë personin nën hetim E.F në Tiranë, i cili organizonte dorëzimin e shumës përkatëse tek personi pritës në Shqipëri. Kjo metodë shmangte çdo gjurmë zyrtare dhe e bënte të pamundur për autoritetet identifikimin e burimit të parave dhe të përfituesve të tyre.
Për të kamufluar aktivitetin kriminal, të dyshuarit kanë përdorur si fasadë zyra këmbimi valutor, agjenci të transferimit të parave dhe agjenci turistike. Këto subjekte janë përdorur për të depozituar paratë në Zvicër dhe për të shpërndarë shumën përkatëse në Shqipëri. Fitimi i grupit kriminal nga çdo transfertë përllogaritet të ketë qenë 6% e shumës, e ndarë në mënyrë të barabartë mes drejtuesit të rrjetit në Shqipëri dhe bashkëpunëtorëve në Zvicër.
Përveç aktivitetit të pastrimit të parave, personat nën hetim dyshohet se kanë organizuar dhe shpërndarë lëndë narkotike në disa kantone të Zvicrës. Ata kanë përdorur persona të tretë si shpërndarës të sasive më të vogla të drogës dhe kanë siguruar rrugët e furnizimit të vazhdueshëm.
Me kërkesë të SPAK, GJKKO ka caktuar masën e sigurimit “arrest në burg” për tre të hetuarit:
· E.F – i dyshuar si drejtues i rrjetit, aktualisht i arrestuar në Zvicër;
· B.F dhe P.K – të dy janë arrestuar në Tiranë më datë 19.07.2025.
Të tre akuzohen për veprat penale: “Prodhim dhe shitje e narkotikëve”, “Pastrimi i produkteve të veprës penale”, “Grup i strukturuar kriminal” dhe “Kryerje e veprave nga grup i strukturuar kriminal”.
Hetimet nuk janë mbyllur ende, pasi Prokuroria po punon për identifikimin e personave të tjerë të përfshirë, vlerësimin e plotë të shumave monetare të transferuara dhe sekuestrimin e pasurive të përfituara nga aktiviteti kriminal.
