Policia e Kurbinit ka zhvilluar një tjetër fazë të operacionit antikanabis të koduar “Koordinata”, duke goditur dy raste të kultivimit të bimëve narkotike në fshatin Zhej, njësia administrative Mamurras.
Gjatë kontrolleve, u arrestua në flagrancë 45-vjeçari I. S., i cili po kujdesej për 25 bimë kanabis të mbjella në oborrin e banesës së tij. Në një rast tjetër, policia vuri në pranga 56-vjeçaren A. P. dhe shpalli në kërkim bashkëshortin e saj, 64-vjeçarin P. P., pasi dyshohet se kishin kultivuar 196 bimë narkotike. Nga kontrolli në banesë u sekuestruan gjithashtu 108 fara kanabisi.
Në total, janë asgjësuar 221 bimë narkotike dhe janë sekuestruar 30 fara të kësaj bime. Policia bën me dije se operacioni “Koordinata” vijon në të gjithë territorin, me synim parandalimin dhe goditjen e kultivimit të bimëve narkotike.
Njoftimi i policisë:
Goditen 2 raste të kultivimit të bimëve narkotike, në fshatin Zhej. Asgjësohen 221 bimë narkotike, sekuestrohen 30 fara të kësaj bime.
Vihen në pranga 2 shtetas, shpallet në kërkim 1 tjetër, autorë të dyshuar të kultivimit të bimëve narkotike.
Gjatë kontrolleve në territor, në vijim të operacionit policor “Koordinata”, me qëllim parandalimin, evidentimin dhe goditjen e rasteve të kultivimit të bimëve narkotike, shërbimet e Komisariatit të Policisë Kurbin, goditën 2 raste të kultivimit të bimëve narkotike në fshatin Zhej, njësia administrative Mamurras. Për këto raste:
– u arrestua shtetasi I. S., 45 vjeç, i cili u kap në flagrancë duke u kujdesur për 25 bimë narkotike që kishte kultivuar në oborrin e banesës;
-u shpall në kërkim shtetasi P. P., 64 vjeç dhe u vu në pranga bashkëshortja e tij, shtetasja A. P., 56 vjeçe, pasi dyshohet se kanë kultivuar 196 bimë narkotike në oborrin e banesës së tyre. Gjatë kontrollit në banesën e tyre, shërbimet e Policisë gjetën dhe sekuestruan 108 fara të bimës narkotike Cannabis Sativa.
