Dalja publike e dy prej përkrahësve historikë të së djathtës shqiptare në SHBA, ish-ambasadorit Rajerson dhe ish-kongresmenti Dioguardi, në favor të votimit të reformës në Drejtësi, nuk përbën ndonjë qëndrim zyrtar të SHBA-ve ndaj krizës kushtetuese në Shqipëri.
Në Uashington egziston një ndarje e qartë mes pozicionimeve zyrtare dhe atyre të natyrës private. E thënë kjo, deklaratat e fundit të dy zyrtarëve amerikanë, miq të deklaruar të Partisë Demokratike dhe të vetë Berishës, janë de facto një kovë me ujë të ftohtë mbi kryet e opozitës shqiptare, në momentin kur ajo ndodhet nën një presion në rritje, për të mos mbajtur peng votat e deputetëve të saj, për paketën kushtetuese për drejtësinë.
Rajerson dhe Dioguardi tregojnë sot shkallën e irritimit që ka shkaktuar në SHBA refuzimi i një pjese të politikës shqiptare, për të miratuar një reformë jetike. Të cilën një zyrtar (apo edhe ish-zyrtar) amerikan, e sheh jashtë skemave meskine dhe llogarive diabolike të një politikani shqiptar, që rëndom trembet se mos bie edhe vetë një ditë viktimë e reformës që duhet të votojë sot.
Dalja “nga rreshti” e Rajerson dhe Dioguardi përbën një apel dhe një sinjal të qartë alarmi për të gjithë ata deputetë demokratë, që sot ndodhen në dilemën e votimit sipas urdhërit zyrtar, apo të kalojnë në anën e atyre që e kërkojnë me forcë këtë reformë pastruese për sot dhe për nesër. Dhe paralelisht me prononcimet e dy ish-zyrtarëve vjen lajmi se amerikanët kanë ndërprë komunikimet zyrtare për reformën me përfaqësuesit e PD. / JAVANEWS
