“Një qëndrim të pakuptimtë, absurd dhe aspak mikpritës”. Kështu e ka cilësuar FSHF vendimin e klubit të Flamurtarit për të mos vënë në dispozicion fushën e stadiumit të Vlorës për Kupën Pavarësia, aktivitet i përvitshëm në nder të 28 Nëntorit. Justifikimi i drejtuesve të klubit vlonjat se terreni i stadiumit rrezikon të prishet edhe si pasojë e rreshjeve të ditëve të fundit, nuk ka mbajtur në sytë e institucionit të futbollit shqiptar që nëpërmjet një komunikate ka reaguar me tone të forta ndaj këtij refuzimi në një komunikatë për shtyp.
FSHF bën të ditur se tradita disavjecare e organizimit të Kupës Pavarësia në Vlorë është prishur nga klubi i Flamurtarit i cili nuk vuri në dispozicion të turneut mbarëkombëtar stadiumin e tij duke vënë në rrezik organizimin e aktivitetit. Federata vec të tjerash nënvizon se Kupa Pavarësia ka hyrë në kalendarin e aktiviteteve si një event ku shqiptarë nga të gjitha trevat mblidhen për të festuar një ditë simbolike sic është Dita e Flamurit dhe për këtë arsye është zgjedhur Vlora për organizimin e tij por për fat të keq kjo traditë është prishur nga vendimi i klubit Flamurtari ndërsa u morrën masat që aktiviteti të zhvillohet në Durrës falë gatishmërisë së klubit Teuta për të vënë në dispozicion stadiumin Niko Dovana.
