Vetëm pak ditë para nisjes së Kupës së Botës 2026 në Shtetet e Bashkuara, një sërë videosh të publikuara në rrjetet sociale kanë ndezur debat të fortë mbi mënyrën se si po trajtohen disa delegacione dhe zyrtarë të futbollit gjatë hyrjes në vend. Pamjet që po qarkullojnë masivisht tregojnë futbollistë, trajnerë, zyrtarë dhe arbitra të nënshtruar ndaj kontrolleve të rrepta të sigurisë, duke shkaktuar reagime të ashpra dhe akuza për trajtim diskriminues.
Një nga videot më të shpërndara tregon lojtarët dhe stafin e kombëtares së Senegalit duke kaluar kontrolle sigurie në pistën e aeroportit, me detektorë metali, bagazhe të kontrolluara dhe procedura të ngjashme me ato që zakonisht aplikohen në operacione të sigurisë së lartë. Pamjet shkaktuan zemërim në rrjetet sociale, ku shumë përdorues pyetën pse futbollistët afrikanë po trajtoheshin në këtë mënyrë.
Sipas raportimeve, komente të shumta në rrjetet sociale ngritën dyshime se delegacione të tjera nuk iu nënshtruan procedurave të ngjashme, ndërsa u pretendua se edhe përfaqësues të Uzbekistanit u përballën me kontrolle të ngjashme në një aeroport tjetër amerikan.
Thierry Henry tha në një reagim se Kupa e Botës në SHBA po duket gjithnjë e më shumë si një rrëmujë. Nga ana tjetër Irani pretendon se FIFA i ka tërhequr kuotën e biletave për Kupën e Botës.
“Sa më shumë e shoh këtë Kupë Bote, aq më shumë më duket sikur futbolli po lufton beteja që nuk kanë asnjë lidhje me sportin. Kjo është ajo që më shqetëson.” – Thierry Henry.
Polemika u thellua më tej pas raportimeve se arbitri i njohur somalez Omar Abdulkadir Artan, i përzgjedhur për aktivitetet e Kupës së Botës, hasi probleme serioze me autoritetet amerikane të emigracionit dhe nuk u lejua të hynte në vend. Lajmi shkaktoi reagime të shumta, që e cilësuan ngjarjen si një tjetër shembull të trajtimit të pabarabartë ndaj përfaqësuesve afrikanë.
Shumë përdorues i cilësuan kontrollet si “poshtëruese”, ndërsa të tjerë pyetën pse lojtarë të njohur ndërkombëtarë duhej të kalonin procedura që ngjanin me trajtimin e të dyshuarve për krime.
Komentues të ndryshëm argumentuan se futbollistët dhe zyrtarët po trajtoheshin “si banditë”, ndërsa të tjerë kërkuan shpjegime nga FIFA dhe autoritetet amerikane për standardet e aplikuara ndaj delegacioneve të ndryshme.
Në mungesë të një reagimi zyrtar nga FIFA ose autoritetet amerikane për rastet e përmendura në rrjetet sociale, polemikat rreth mënyrës së pritjes së disa pjesëmarrësve në Kupën e Botës 2026 pritet të vazhdojnë edhe në ditët në vijim.
“Tutti si lamentano delle strutture e organizzazione, delle strutture di allenamento e negli aeroporti, così come della detenzione di giocatori, fotografi, arbitri, allenatori, e sarà la peggiore edizione della Coppa del Mondo di sempre”. M.Bielsa pic.twitter.com/ENMLPojijo
— Sottoporta (@Sottoporta_ICI) June 8, 2026
