Kreu i Komisionit të Ligjeve Fatmir Xhafaj ka dalë në një deklaratë urgjente për mediat duke u shprehur se ky komunikim nuk është një kundërvënie ndaj takimit që ministri Manjani po zhvillon me gjyqtarët dhe prokurorët, por për të bërë një sqarim.
“Reforma në Drejtësi, nga një tabu, është një realitet i prekshëm. Ndihem mirë kur shoh rrugën që ka përshkuar reforma, një proces i shkëlqyer, gjithëpërfshirës, transparent dhe profesional, me ekspertë të standardeve më të lartë të fushës. Asnjë ligj në këtë vend në 25 vjet nuk e ka pasur fatin e mirë të kalojë përmes një procesi të këtyre standardeve” – tha Xhafaj.
Në fjalën e tij Xhafaj theksoi se ata që sulmuan reformën deri dje, sot duan të jenë pjesë e saj. Deklarata e Xhafës erdhi pasi gjyqtarët dhe prokurorët në takim me ministrin e Drejtësisë thanë sot se janë të gatshëm të ndihmojnë në zbatimin e reformës hap pas hapi. Nga ana tjetër Xhafaj tha se drafti ka kaluar në të gjitha proceset e konsultimit duke shënuar një arritje historike sa i përket konsesusit dhe diskutimeve për një ligj.
“Dihet mirë që ato që çfarë nuk kanë thënë dhe kanë gjuajtyur më fjalë guri ndaj reformës, sot janë duke vrapuar të bëhen pjesë e saj e për t’u rreshtuar në krah të reformës e reformatorëve” – tha kreu i Komisionit të Ligjeve.
Ai u shpreh se reforma nuk do të jetë më një produkt i pazareve partiake që e katandisën këtu ku është sot dhe krijuan këtë gjendje skandaloze të sistemit.
“Nuk mund të presim lajm më të mirë në këtë fundviti që reforma në drejtësi të kthehet në një angazhim të sinqertë për të nxjerrë produktin që meriton Shqipëria” – theksoi Xhafaj.
Xhafaj falenderoi partnerët ndërkombëtarë dhe në veçanti ambasadorët Vlahutin dhe Lu për shtysën që kanë dhënë në këtë proces. (javanews.al)
