Ministrja e Arsimit, Mirela Kumbaro, gjatë mbledhjes së Komitetit të Emergjencave Civile, ka dhënë një panoramë të plotë mbi gjendjen e shkollave.
Ajo deklaroi se “sot mësimi është i ndërprerë në 54 shkolla në të gjithë vendin, kryesisht në qarkun e Durrësit në zonat si Krujë, Sukth, Katund i Ri apo edhe në Fier, Gjirokastër e Vlorë. Mes tyre prej tre ditësh mësimi është i pezulluar edhe në Universitetin e Durrësit ‘Aleksandër Moisiu’ për shkak të përmbytjes”.
Kumbaro shpjegoi se komunikimi me drejtorët e shkollave dhe mësuesit është bërë në mënyrë të vazhdueshme, duke u mbështetur në rrjetin e komunikimit të ngritur për situata emergjente.
“Kemi qenë në kontakt për çdo orë për situatën nëpër shkolla në zonat ku u përballëm me këtë situatë. Kemi qenë në komunikim në mënyrë kapilare me çdo drejtor dhe me gjithë mësuesit nëpërmjet rrjetit të komunikimit”, tha ajo.
Sipas bilancit të paraqitur, në qarkun e Tiranës mësimi ka nisur normalisht në të gjitha shkollat, ndërsa në qarkun e Durrësit ka pasur ndërprerje të përkohshme në 12 shkolla, kryesisht në Krujë, Sukth, Katund i Ri dhe Durrës.
“Po ashtu, në Universitetin “Aleksandër Moisiu” mësimi është pezulluar për shkak të pamundësisë së aksesit, por pritet të rifillojë ditën e hënë. Në Dibër, Lezhë dhe Shkodër mësimi vijon normalisht, ndërsa më problematike paraqitet situata në qarkun e Vlorës, Fierit dhe Gjirokastrës, ku rreth 10 shkolla kanë pasur ndërprerje të kontrolluara për arsye sigurie.”
Ministrja sqaroi se ndërprerja e orës mësimore është bërë pikërisht në këto shkolla për të garantuar sigurinë e nxënësve dhe mësuesve, sidomos atyre që duhet të udhëtojnë në zonat më të thella.
Në Vlorë ndërprerjet janë regjistruar kryesisht në Borsh, Orikum, Novoselë, Vlorë dhe Ferras, ndërsa në Gjirokastër në Ballaban dhe Piskovë.
“Në pjesën tjetër të vendit mësimi vijon normalisht, por në qarqet Korçë, Berat dhe Elbasan janë raportuar rreth 32 shkolla me ndërprerje, kryesisht në zonat malore si Skrapar, Kolonjë, Librazhd, Gramsh, Pogradec dhe Labinot. Ky bilanc i paraqitur nga ministrja Kumbaro tregon se pavarësisht vështirësive të shkaktuara nga përmbytjet, procesi mësimor është mbajtur nën kontroll dhe ndërprerjet janë bërë vetëm për arsye sigurie, ndërsa pritet që në ditët në vijim situata të normalizohet.”
Nga ana e tij, kryeministri Edi Rama ka garantuar sot mbështetje të plotë për qytetarët e prekur nga përmbytjet, duke theksuar se qeveria do të përmbushë çdo detyrim ndaj tyre, si për banesat ashtu edhe për gjënë e gjallë. Në të njëjtën kohë, vëmendja është përqendruar edhe tek sistemi arsimor, ku reshjet e dendura dhe përmbytjet kanë shkaktuar ndërprerje të procesit mësimor në disa zona të vendit.
