Sekretari i përgjithshëm i NATO-s Jens Stoltenberg, pas ngjarjeve në Kumanovë, i bëri thirrje Maqedonisë që të qetësohet për të evituar një përshkallëzim të mëtejshëm të situatës.
Stoltenberg ka kërkuar edhe hetim transparent për konfliktin në të cilin u vranë tetë policë maqedonas dhe 14 pjesëtarë të ashtuquajtur “një grupi të armatosur”.
“Kërkoj nga secili në Maqedoni që të përmbahet dhe të evitojë përshkallëzimin e mëtejshëm në interes të shtetit dhe të tërë rajonit”, ka deklaruar ai.
Edhe Sekretari i Përgjithshëm i OKB-së, Ban Ki Moon ka kërkuar hetim transparent dhe objektiv të ngjarjeve në Maqedoni, siç është kriza në Kumanovë. Ai shprehur shqetësime për situatën e krijuar dhe se bëri thirrje për përmbajtje.
“Sekretari i përgjithshëm fuqimisht mbështet thirrjet e BE-së dhe të anëtarëve të tjerë të bashkësisë ndërkombëtare të cilët i kanë bërë thirrje autoriteteve dhe të gjithë udhëheqësve politik që të bashkëpunojnë për të kthyer stabilitetin dhe plotësisht të hetojnë ngjarjet në mënyrë objektive dhe transparente.”, thuhet në komunikatën e zyrës së sekretarit të përgjithshëm të OKB-së.
Në këtë situatë kërkohet që të tregohet përmbajtje maksimale dhe të shmanget retorika që do të mund të eskalonte tensionet.
Edhe Komisioni Evropian përmes Johannes Hahn tha se duhet evituar përshkallëzimi i mëtejshëm dhe se të gjithë pjesëmarrësit duhet të tregojnë përmbajtje.
Ndërkohë reagim ka pasur edhe nga qeveria gjermane e cila ka bërë thirrje për qetësim të menjëhershëm të situatës.
Zëdhënësi i Ministrisë së Jashtme gjermane në Berlin është shprehur të hënën se “me urgjencë kërkohet të mënjanohet një shkallëzim i mëtejshëm i situatës”.
“Qeveria gjermane po i ndjek me shqetësim prej disa kohësh zhvillimet e brendshme politike në shtetin ballkanik.” tha zëdhënësi i Ministrisë së Jashtme gjermane në konferencën e shtypit.
Nga ana tjetër gazeta gjermane “Die W” për ngjarjet në Maqedoni ka dalë me titull “Shteti më pak i qëndrueshëm në Evropë në prag të luftës”.
