90 minutat e javës së 14 kanë rikthyer Laçin dhe Kukësin te tri pikët. Kurbinasit kanë festuar në fund, pasi kanë shënuar në kohën shtesë për të regjistruar rezultatin 2-1 kundër Kastriotit, ndërsa Kukësi ka mbyllur gjithçka në pjesën e parë duke fituar 0-2 kundër skuadrës së Ernest Gjokës.
Kamza – Kukësi 0-2 | Shënues: Frashëri 29 (a), Teqja 33’ (a)
Në Kamzë pritej një ndeshje e luftuar fort dhe kështu ishte deri në minutën e 25, më pas Kukësi krijoi më tepër shanse për të shënuar dhe e arriti që të gjente rrjetën pas një gabimi të mbrojtësit Frashëri të skuadrës kamzalie. Korçari i Kamzës në pamundësi për të larguar topin me kokë jashtë vijësh së 16 metërshit, e dërgon atë në rrjetën e portierit Kiriev.
Autogoli i parë i dha goditje të rëndë psikologjike skuadrës së Ernest Gjokës, i cili debutoi sot në këtë pankinë. Ndërsa si të mos mjaftonte kjo, Teqja në minutën e 33 shënoi sërish në portën e tij.
Kukësi e pati më të lehtë të administronte lojën në pjesën e dytë, teksa Armando Cungu më së miri kontrolloi të tijtë duke mos lejuar pësim golash. Kukësi rikthehet sërish te fitoret dhe te gara për një vend në kreun e tabelës.
Laçi – Kastrioti 2-1 | Shënues: Altiparmakovski 61’, Xhixha 91’ / Ymeri 70’
Kurbinasit riktheheshin në fushën e tyre pas dy muajsh, ku arritën që të bënin fitore të vështirë, por marin tri pikë me vlera për garën për Europën. Pjesa e parë ishte pothuajse e balancuar me krutanët, skuadër që i vuri në vështirësi në disa raste bardhezinjtë.
Në pjesën e dytë volumi u rrit nga ana e Laçit, që në minutën e 61 me Altiparmakovskin arrijnë që të çojnë topin në rrjetë, 1-0 dhe entuziazmi shpërtheu te kurbinasit. Veç kësaj, me Xhixhën pak minuta më vonë patën shansin që të dyfishonin rezultatin, por që nuk u tregua i saktë djaloshi nga Laçi.
Megjithatë, një aksion i rrjedhshëm i Kastriotit në zonën e Laçit solli dhe golin e barazimit në minutën e 70 me Ymerajn. Më tej ekipi krutan shkoi shumë pranë kalimit në avantazh, por Laçi me freskimet e lojës arriti që të krijojë më tepër volum dhe raste shënimi.
Gjithnjë në fund, fati ishte me kurbinasit që me anë të Xhixhës çuan topin në rrjetë, 2-1 dhe kështu konkretizojnë tri pikë me mjaft vlera për luftën për një vend në katërshen e parë. (Tema)
