Driton Kuka, trajneri i Majlinda Kelmendit, që ia solli Kosovës medaljen e parë të artë në Lojëra Olimpike, me triumfin në kategorinë deri 52 kilogramë në xhudo në “Rio 2016”, thotë se ekipi i tij menjëherë do të nisë punët për garat e ardhshme.
Ai ka përsëritur kërkesën e tij që xhudo të shpallet interes nacional dhe nëse kjo realizohet, sipas tij, në Lojërat Olimpike të ardhshme “Tokio 2020” do të jenë katër xhudistë nga Kosova.
“Ne do të vazhdojmë të punojmë. Jemi duke e rritur ekipin. Kemi ekip më të madh të identifikuar në mënyrë serioze. Kam kërkuar që xhudo të shihet interes nacional që të kemi program më serioz.
Duhet të kemi njerëz rreth vetes sepse nëse rritet numri i garuesve do të duhet të kemi një shtab. Nëse bëhen këto besoj se do të kemi katër garues me normë olimpike”, ka deklaruar ai për KTV-në, pas arritjes në lagjen e tij në Pejë, citohet Koha. (b.an)
