Fjalimi i Edi Ramës i mbajtur paraditen e sotme në ‘Ditën e Medias” ka irrituar një prej gazetarëve të huaj, të ftuar në konferencë.
Pasi është ngritur në panel, gazetari malazez Zeljko Ivanoviç i të përditshmes ‘Vijesti’ tha se “fjalime të tilla prodhojnë vrasje”, duke iu referuar fjalëve të Ramës në panel.
“Fillimisht dua te flas për fjalimin që beri zoti Rama në panelin e parë.
Unë mendoj se ishte vërtete një skandal ajo çka ai tha. Për 25 minuta ai foli për kredibilitetin e medias dhe të gazetarëve.
Ndërsa për gati 5 minuta kryeministri Rama foli për rëndësinë e lirisë së shtypit. E njëjta gjë do kishte ndodhur po të ishte këtu me Vuçiç apo presidenti Trump.
U ndjeva totalisht si ta them i sulmuar. Për 13 vite me radhë, tre herë në ditë redaktori bërtet: ‘Mbledhje!!!’ ku flasim dhe diskutojmë për besueshmërinë e burimeve, për historitë që do mbulojmë të nesërmen.
Tre herë në ditë kjo për kaq shumë vite, e pas kësaj një kryeministër del këtu siç doli zoti Rama për 25 minuta e na thotë sesi media duhet të jetë e besueshme”
Gazetari ka shkuar më tej në replikën e tij me kryeministrin shqiptar, kur solli si shembull vrasjen e koleges në Maltë nga mafia.
“Ne jemi të besueshëm. Por problemi ka të bëjë me politikanët. Psh; në Malte ndodhi një vrasje, dhe këto lloj fjalimesh prodhojnë këto vrasje.
Kryeministri atje për vite i thoshte gazetares që nuk kishte besueshmëri. Dhe më në fund ajo u ekzekutua nga mafia” u shpreh Ivanoviç.
Në fjalën e tij Rama foli për mediat, si institucione të pabesueshme për shoqërinë, që përdoren për gjueti, në funksion të pasurive të tejskajshme.
“Ne kemi një problem të rëndësishëm, që është pjesë e një procesi tërësor transformimi, të cilin nuk e sjellin thjesht ligjet, por e sjell transformimi i brendshëm në mendësi, për t’ju afruar e për t’u bërë pjesë e familjes europiane si mendësi, që ka të bëjë në rastin tonë, me shfrenimin e gjuhës së urrejtjes dhe me përdorimin e licencës për të ushtruar aktivitet në këtë fushë kaq jetike dhe kaq delikate, si licencë për gjueti, për gjueti për qëllime që nuk thuhen, por që janë shtysa kryesore në funksion të ushtrimit të të drejtës së kësaj licence” u shpreh Rama.
