Autoritetet kubaneze dënuan deklaratat, sipas tyre, jokorrekte dhe të papranueshme të presidentit amerikan, Donald Trump, që e cilësoi dje regjimin kuban të korruptuar dhe destabilizues para Asamblesë së Përgjithshme të OKB-së.
“Ky fjalim ka qenë jokorrekt dhe i papranueshëm”, reagoi qeveria kubane në një komunikatë, ndërkohë që ministri i Punëve të Jashtme, Bruno Rodriguez e cilësoi këtë ndërhyrje të pazakontë, agresive, dominuese dhe shumë imperialiste, në një intervistë për stacionin televiziv venezuelian TV Telesur.
Para Asamblesë së Përgjithshme të OKB-së, presidenti amerikan dënoi regjimin e korruptuar dhe destabilizues kuban, në një fjalim të ashpër gjatë të cilit ai foli për Korenë e Veriut, Iranin dhe Venezuelën, aleate e afërt e Havanës.
“Nga Bashkimi Sovjetik në Kubë dhe në Venezuelë, kudo ku socializmi i vërtetë dhe komunizmi u miratuan, janë shkaktuar vuajtje, dëshpërim dhe dështim. Ata që predikojnë këto ideologji kontribuojnë vetëm për vuajtjen e personave që jetojnë nën këto sisteme mizore”, konfirmoi Trump.
Në një komunikatë, Ministria kubane e Punëve të Jashtme shprehu keqardhje për prishjen e marrëdhënieve kubano-amerikane dhe retorikën e përballjes nga administrata Trump, që bie ndesh me politikën e afrimit të ndërmarrë që prej fundit të vitit 2014 nga ish-presidenti demokrat, Barack Obama. /b.d
