Për herë të parë administrata tatimore do të kthejë brenda muajit dhjetor 500 milion lekë në llogaritë e bizneseve, si pasojë e një ligji të shpallur antikushtetues.
Tatimet kërkojnë dhe apelojnë ndaj tatimpaguesve që të verifikojnë llogaritë e tyre bankare, në mënyrë që të shmangin çdo paqartësi në kthimin e parave.
“Është shumë e rëndësishme për ne, që deri në datën 10 dhjetor çdo tatimpagues të mund të verifikojë llogaritë bankare në lek, ti përditësojë të dhënat në portalin E-filing, në mënyrë që të mos ketë vonesa në kthimin e fondeve. Ata që i kanë të sakta këto të dhëna nuk kanë nevojë të bëjnë asnjë veprim tjetër, pasi është tashmë detyra jonë për të rimbursuar paratë e paguara”, tha Rozana Çelmeta nga administrata tatimore gjatë një intervistë për Vizon Plus.
Në total janë rreth 6500 tatimpagues që do të marrin paratë e paguara. Por ka dhe një veprim të dytë që do të bëjnë tatimet.
“Përveç rimbursimit të parave, ne do të anulojmë dhe çdo detyrim të lindur nga ligji, por që nuk është paguar. Ky veprim bën që bizneset të mos shpallen debitor në tatimet”, tha Çelmeta.
Por çfarë ndodh nëse paratë nuk ndahen brenda muajit dhjetor?
“Ne kemi si afat datën 30 dhjetor për të përfunduar këtë proces, por nëse kjo nuk ndodh për disa tatimpagues, për arsye paqartësie të të dhënave bankare fondet nuk digjen, por do të përfundojë ky proces edhe në vitin pasardhës”, sqaroi Çelmeta.
Qeveria u detyrua që të vendosë të kthejë paratë e parapaguara nga bizneset, për një ligj që Gjykata Kushtuese e shpalli antikushtetues.
/a.r
