Kryeredaktori i gazetës Rilindja Demokratike është thirrur në seancë dëgjimore në Komisionin e Medias lidhur me incidentin ku ai u përfshi në protestën 26 Majit.
Ai ka deklaruar se u gjend papritur para dhunës policore dhe u detyrua të vetëmbrohej kur vendosi duart te bandjera e hekurt.
Ai thotë se ishte bashkë me gazetarët e tjerë. Pyetja që ngrihet është se pse gazetarët e tjerë nuk u “detyruan” të vetmbrohen nga rrethanat e të shtynin kordonin policor?
“Ne si gazetarë kemi qëndruar në një podium, kam bërë shuëm foto dhe kam ndihmuar edhe shumë kolegë. Çdo gjë dukej e qetë, derisa forcat speciale nisën dhunën. Një protestues ra pa ndjenja 4 minuta para incidentit, u godit me shkopinj gome. Pas këtij incidenti jemi gjendur në kushtet e vetëmbrojtjes. Duke qenë se ishte e pamundur, pasi edhe numri i protestuesve ishte i madh, një nga këto zgjedhje ishte edhe ajo që bëra unë, vendosa të vetëmbrohesha duke vendosur duart te bandjera e hekurit”, deklaroi Kasmi.
Ai tha se pasi ka parë pamjet, është bindur se sulmi ndaj tij ishte i përgatitur.
Ai tha më tej se drejtori i policisë tentoi të manipulojë ngjarjen. Kasmi zbardhi edhe bisedën me Ardi Veliun në spital.
“Ka pasur ndërhyrje në spital, drejtori i policisë. E kuptova dhe e mora mesazhin e vizitës si një ndërhyrje për të arritur një lloj paqtimi, mirëkuptimi. Zotëria më tha që erdhi për të parë situatën. Më pyeti për gjendjen. I thashë se u godita nga një shkop gome. Atëherë më tha se shkopi nuk shkakton çarje. Aty kuptova që nuk kishte qëllim të dënonte dhunën, të distancohej, por kishte qëllim manipulimin. Në këtë moment pati acarim, por ishte ndërhyrja e mjekut profesional i cili i tregoi të vërtetën e plagës, sipas të cilit plaga ishte nga një mjet i rrumbullakët”, tha ai./a.m.
