Kryeministri Edi Rama ka përkujtuar 100 vjetorin e ringritjes së flamurit të vetqeverimit të Shqipërisë për mbarë zonën e Korçës nga ana e Themistokli Gërmenjit, nepermjet nje fotoje mjaft të veëante. Më poshtë postimi i kreut të qeverisë:
“Kjo fotografi që për fatin tonë është gjetur dhe ruajtur nga një dashnor i historisë, shfaq momentin e fjalës së heroit Themistokli Gërmenji, më 10 dhjetor 1916, plot 100 vjet më parë, kur ringriti flamurin e vetqeverimit të Shqipërisë për mbarë zonën e Korçës.
Me mirënjohje përulemi përpara këtij akti të madh patriotik, mbajtur mbi supet e 14 burrave të krishterë e myslimanë, që nuk deshën vetëm një Korçë shqiptare, por edhe një shtet shqiptar në Korçë, me të gjithë atributet e një fuqie publike në mbrojtje të rendit e të përparimit dhe në shërbim të publikut e të qytetarëve.
Republika autonome e Korçës nuk jetoi gjatë jo sepse dështoi në misionin e saj, por sepse pati një sukses që tejkalonte pritshmëritë, duke i shfaqur shqiptarët si një komb të denjë për tu vetëqeverisur në paqe.
Makinacionet që shkaktuan ekzekutimin e Themistokli Gërmenjit, nuk mundën, gjithsesi, të kthejnë prapa përparimin që bëri Korça gjatë kohës së vetqeverimit të saj, për tu bërë plotësisht shqiptare dhe plotësisht qytetare.
Lavdi heronjve dhe patriotëve të Korçës”
