Kryeministri i Kosovës, Isa Mustafa thotë se nuk shikon një shtim të ekstremizmit në Kosovë.
Ai mori pjesë në një takim të nivelit të lartë në Nju Jork për luftën kundër ekstremizmit të dhunshëm, krahas dhjetra udhëheqësve të tjerë nga e gjithë bota. Në një intervistë dhënë për “Zërin e Amerikës”, Mustafa komentoi edhe për trysninë që po i bëhet qeverisë nga opozita, e cila kërkon tërheqjen e Kosovës nga marrëveshjet e nënshkruara kohët e fundit me Serbinë.
Mustafa thotë se numri i qytetarëve nga Kosova që luftojnë aktivisht në Siri dhe Irak ka patur rënie: “Unë mendoj se numri i atyre që kanë shkuar është i kufizuar. Ne tani llogaritim, në bazë të të dhënave të intelligjencës, që mund të kemi rreth 70 njerëz që janë aktivisht atje.”
