Kryeministri i Maqedonisë së Veriut, Hristijan Mickoski, ka zhvilluar një vizitë në Tuminec të bashkisë Pustec, ku ka marrë pjesë në ceremoninë përkujtimore për heronjtë e rënë gjatë Luftës së Dytë Botërore.
Në fjalën e tij, Mickoski u bëri thirrje për ruajtjen e vlerave të identitetit kombëtar dhe theksoi rëndësinë e bashkimit të të gjithë faktorëve shoqërorë e politikë. Ai deklaroi se populli maqedonas, pavarësisht kufijve dhe sfidave historike, ka arritur të ruajë gjuhën, kulturën, traditat dhe identitetin e tij ndër vite.
“Sot nuk jemi mbledhur vetëm para një monumenti. Sot jemi mbledhur para dëshmisë, para historisë që nuk mund të fshihet, sepse është shkruar me sakrificë, me guxim dhe me dashuri për Maqedoninë. Ky monument në Tuminec u kushtohet heronjve maqedonas, pjesëmarrës në luftën nacionalçlirimtare kundër okupatorit fashist bullgar. Njerëz që në ditët më të errëta të Luftës së Dytë Botërore nuk u lëkundën, nuk u fshehën dhe nuk hoqën dorë nga populli i tyre dhe nga identiteti i tyre. Ata nuk pyesnin sa e vështirë ishte lufta. Ata bënin vetëm një pyetje: si të ruhet nderi dhe liria. Dhe për këtë arsye sot emrat e tyre qëndrojnë krenarë, ashtu siç është ngritur krenare edhe ideja maqedonase ndër shekuj. Ky vend është dëshmi se populli maqedonas, pa marrë parasysh kufijtë, kohën apo presionet, kurrë nuk ka pushuar së jetuari me të vërtetën e vet, me gjuhën e vet, me këngën e vet dhe me përkatësinë e vet.
Tumineci nuk është vetëm një fshat. Ky është një monument i qëndresës, i dinjitetit, i rrënjës që nuk mund të shkulet“, u shpreh Mickoski.
Ai vlerësoi qëndresën e maqedonasve në Shqipëri, duke i cilësuar ata si pjesë të pandashme të trungut kombëtar maqedonas dhe qytetarë besnikë të Shqipërisë. Sipas tij, ruajtja e identitetit ndër dekada përbën një shembull dinjiteti dhe përkushtimi.
“Maqedonasit në Shqipëri janë pjesë e pandashme e trungut kombëtar maqedonas. Dhe maqedonasit në Shqipëri janë qytetarë besnikë të Shqipërisë. Qëndresa juaj ndër dekada është një vepër e denjë për respekt. Ju e ruajtët emrin maqedonas, gjuhën, traditën dhe shpirtin atëherë kur ishte më së vështiri. Dhe për këtë arsye sot dua të dërgoj një mesazh të qartë: mëmëdheu nuk do të harrojë kurrë. Maqedonia qëndron me popullin e saj kudo që ndodhet, me respekt, me kujdes dhe me mbështetje të sinqertë“, tha ai.
Mickoski theksoi gjithashtu se Maqedonia ka nevojë për unitet dhe bashkim rreth interesave kombëtare dhe së ardhmes së brezave të rinj.
“Maqedonisë sot më shumë se kurrë i nevojitet bashkimi. Të bashkohemi rreth interesave kombëtare, rreth së ardhmes së fëmijëve tanë, rreth respektit për historinë tonë dhe dinjitetin e popullit. Paraardhësit tuaj nuk u ndanë kur mbronin lirinë. Nuk pyesnin kush nga ishte dhe as kujt i përkiste. Të gjithë qëndronin nën një emër. Këtë mësim duhet ta mësojmë edhe sot. Mund të kemi mendime të ndryshme, qëndrime të ndryshme politike dhe pikëpamje të ndryshme, por kur bëhet fjalë për atdheun, për interesat kombëtare dhe për unitetin e popullit maqedonas, duhet të jemi bashkë. Sepse vetëm të bashkuar mund të jemi të fortë. Vetëm të bashkuar mund të krijojmë përparim. Dhe vetëm të bashkuar mund ta ruajmë Maqedoninë si shtet me dinjitet, identitet dhe perspektivë“, tha ai.
Në mbyllje të ceremonisë, Mickoski nderoi sakrificën e heronjve dhe theksoi se kujtesa historike mbetet themel për ndërtimin e shtetit dhe ruajtjen e identitetit kombëtar.
