Kryeministri i Luksemburgut, Xavier Bettel, njoftoi heqjen dorë nga diploma e marrë në vitin 1999, pas akuzave për plagjiaturë.
Bettel tha se i ka kërkuar Universitetit të Lorraine-s në Francë të anulojë diplomën e nivelit Master që iu dha në 1999 “për të hequr çdo dyshim në lidhje me meritat e DEA (gradë) dhe për të shmangur humbjen e besimit në punën akademike“, raporton “Le Monde“.
Bettel nuk e ka pranuar se ka kopjuar dhe në një deklaratë është shprehur se nuk ka qenë qëllimi i tij të mashtrojë askënd në atë kohë.
Akuzat per plagjiature u ngritën për herë të parë në një artikull të gazetës luksemburgase “Reporter”, e cila thoshte se “më shumë se tre të katërtat” e tezës që Bettel ka dorëzuar në 1998 – mbi reformën e votimit në zgjedhjet evropiane – ishin marrë nga burime të pacituara.
Kryeministri 48-vjeçar, jurist në profesion, ka edhe një diplomë master nga Universiteti i Lorraines.
Në një deklaratë, universiteti njoftoi se pas një verifikimi i ka kërkuar z. Bettel të bëjë sërish temën e diplomës, duke e plotësuar me citimet e munguara.
Ndërsa Bettel u përgjigj se puna e tij ishte origjinale, megjithëse ai pranoi se nuk kishte dhënë “referenca tekstesh të veçanta për pasazhe individuale”, të cilat mund të konsiderohen “një formë plagjiature”./m.j
