Një ditë para seancës për zgjedhjen e kryeprokurorit të përkohshëm, LSI ka mbledhur Komitetin Drejtues Kombëtar, për të vendosur për protestën që opozita organizon nesër.
Me një fjalor fyes, kryetarja e LSI, Monika Kryemadhi deklaroi se kryeministri kërkon të kapë kryeprokurorin nga frika e çështjes Tahiri. Kryemadhi ka shpërthyer në akuza të forta për kryeministrin Edi Rama duke mos kursyer edhe epitetet më të rënda, si ‘i çmendur’, ‘me të meta mendore’, ‘lolo’.
“ Frika dhe ankthi që Rama ka nga çështja Tahiri e çon drejt uzurpimit. Kërkon të zgjidhë kryeprokuror politik.Çështja e kryeprokurorit nuk është çështje emrash, për ne ka rëndësi që sistemi i drejtësisë të jetë i pavarur dhe që të funksionojë për shqiptarët. Shqiptarët janë të qartë për dosjet që kanë fjetur në zyrat e Prokurorisë, si ajo e puseve të naftës” tha bashkëshortja e Presidentit.
Kryemadhi, duke paralajmëruar destabilitet, deklaroi se LSI është e vendosur të mos lejojë që këto institucione të vijojnë në këtë rrugë. Monika Kryemadhi u shpreh nuk do të lejohet zgjedhja e Kryeprokurorit të Përkohshëm.
“E vetmja rrugë e jona është të kthehemi në njerëz që nuk e pranojmë këtë realitet, por të reagojmë me të gjitha mënyrat që na lejon ligji dhe morali njerëzor. Rama po kërkon të fusë Parlamentin në destabilitet. Mazhoranca po shkel Kushtetutën, pasi ka dalë nga votat e drogës dhe të krimit. Nëse kjo Kushtetutë do të shkelet nga një maxhorancë, ne si grup parlamentar jemi shumë të qartë për të mos e lejuar këtë proces nesër në seancë dhe kërkojmë përkrahjen e të gjithë atyre burrave e grave, djem e vajza për të mos u bërë skllevër.Do mblidhemi nesër dhe nuk do të lejojmë kapjen e kryeprokurorit nga maxhoranca. Nuk ka kryeprokuror që të fshehë paratë e drogës të Saimir Tahirit”, tha Kryemadhi
Kryemadhi i bëri thirrje anëtarësisë së LSI dhe qytetarëve shqiptarë të bëhen pjesë e protestës së nesërme që do të zhvillohet përpara selisë së Kuvendit.
javanews/a.ç
