Ndotjeve të furrave të gëlqeres, guroreve dhe fabrikave të çimentos në rrethin e Krujës i janë shtuar edhe ato të fabrikave të këpucëve të cilat grumbullohen në ambientet e ish-fabrikës së çembrionizimit në Fushë-Krujë.
Kur sasia e tyre arrin në masën maksimale, atyre ju vihet flaka dhe zjarri rrezikon mjaft banesa rreth e qark ndërsa tymi e bloza mbulojnë jo vetëm qytetin e Fushë-Krujës por edhe hapësira të mëdha deri në Tapizë e Thumanë.
Po ashtu flakët që arrijnë në 10-15 metra kanë përfshirë edhe kabllot elektrike ajrore që kalojnë aty pranë duke lënë në errësirë me qindra familje.
Në rrethin e Krujës punojnë 12 fabrika këpucësh dhe në atë të Kurbinit 4 të tilla. Janë një numër i madh zjarresh që kanë shpërthyer për djegien e këtyre mbeturinave të cilët kanë shkaktuar një situatë alarmante në qytet e më gjerë dhe për shuarjen e këtyre zjarreve janë thirrur në ndihmë edhe zjarrfikëse nga Durrësi e Tirana.
Po ashtu edhe një rrezik i paimagjinueshëm është se djegia e këtyre mbeturinave ka dobësuar strukturat prej betoni të kësaj fabrike dhe ajo rrezikon të shembet në çdo moment duke shkaktuar pasoja të rënda tek pallatet që ndodhen afër saj dhe tek banorët e tyre.
Inxhinierë ndërtimi të pyetur për këtë problem, jashtë kamerës thonë se zjarri i ka dobësuar këto kolona dhe ato tashmë nuk janë në gjendje të rezistojnë edhe për shumë kohë.
Por me gjithë këto probleme që kanë shkaktuar këto zjarre, as bashkia dhe as policia nuk kanë marrë asnjë masë.
Grumbullimi i tyre vazhdon pa asnjë shqetësim dhe sikur të mos mungonte kjo këta njerëz kanë filluar të grumbullojnë goma makinash të përdorura duke shtuar kështu jo vetëm llojshmërinë e gazrave helmuese e kancerogjene në atmosferë por edhe agresivitetin e flakëve që mund të shpërndajnë zjarrin në banesat rreth e qark./shqiptarja.com/a.k
