Gjatë një vizite në qytetin e Gjirokastrës, Kreu i parlamentit Ilir Meta ka folur për herë të parë në lidhje me krizën e emigrantëve, duke thënë se Shqipëria do të japë të gjithë kontributin e saj, por me aq sa ka mundësi.
Kryeparlamentari, njëkohësisht dhe kreu i forcës së dytë qeverisëse shtoi në lidhje me çështjen se do duhet që SHBA dhe BE ti japin fund krizës në vendet e origjinës.
“Mendoj se zgjidhja kryesore lidhur me krizën e refugjatëve nuk është thjesht përballimi dhe pasojat e krizës, por është përqendrimi i BE-së, i SHBA-ve dhe i aktorëve të tjerë të rëndësishëm, për t’i dhënë fund konfliktit në Siri dhe vatrave të konfliktit edhe në zona të tjera, nga ku kemi aktualisht burimin e krizës, por edhe burimin e refugjatëve që duan t’i largohen luftës. Përsa i takon përballimit të kësaj krize, sigurisht që Shqipëria si një vend demokratik por edhe si pjesë e komunitetit euro-atlantik dhe atij europian në ndarjen e vlerave, jam i bindur do të japë kontributin e saj për aq sa i ka mundësitë dhe kapacitetet e saj.”- tha Meta.
Në lidhje me reformën në drejtësi, Meta tha se të gjithë kanë rënë dakort për standartin, atë të vendosur nga Komisioni Venecias. Në gjykimin e Metës klima politike për kalimin e reformës është pozitive.
