Spanja njoftoi se po instalonte një barrierë kontrolluese 500 metra të gjatë në kufirin detar midis territorit të saj të Afrikës së Veriut, Ceutës, dhe Marokut fqinj, pasi midis 50,000 dhe 60,000 emigrantë kaluan kufirin më parë këtë javë.
Numri i të vdekurve është rritur në 67, përfshirë disa që u mbytën dhe të tjerë që u vranë në një rrëmujë për të kaluar një pengesë dallgëthyese, tha qeveria spanjolle të shtunën.
Një numër emigrantësh të rraskapitur që notuan drejt plazhit urban Tarajal të Ceutës të shtunën në mëngjes u pritën nga ushtarët që i shoqëruan ata përtej kufirit. Ministria e Brendshme e Spanjës thotë se shumica e atyre që hynë në territorin spanjoll në Afrikën e Veriut janë kthyer tashmë në Marok.
“Ne jemi të pamëshirshëm kundër atyre që shkelin ligjin”, u tha gazetarëve në Ceuta të shtunën Ministri i Brendshëm spanjoll Fernando Grande-Marlaska.
I pyetur se si mund të kishte ndodhur kjo shkelje masive e kufirit duke pasur parasysh sigurinë e lartë në të dyja anët e kufirit dhe nëse Maroku përbënte një kërcënim për Ceutën, Marlaska mbrojti qeverinë në Rabat.
“Ngjarjet kërkojnë një vlerësim nga Spanja dhe Maroku”, tha ai. Por ishte bashkëpunimi me fqinjët e saj që i lejoi Spanjës “të ndryshonte situatën brenda 24 orësh”.
“Maroku nuk përbën kërcënim për Ceutën ose për pjesën tjetër të Spanjës. Është një partner i besueshëm”, theksoi Marlaska.
Pas ditësh kaosi dhe rrugësh të mbushura me njerëz që kishin shpresuar për një jetë më të mirë në Spanjë, banorët e Ceutës u zgjuan të shtunën në një qetësi të pakëndshme.
Megjithatë, siguria në qytetin autonom me 84,000 banorë mbeti e dëmtuar.
“Jeta në këtë qytet është ndërprerë si pasojë e incidentit kufitar”, tha Presidenti i Ceutës, Juan Jesus Vivas.
