Vetëm 6 nga 10 skuadrat e Kategorisë Superiore plotësojnë kriteret e vendosura nga UEFA për pjesëmarrje në kupat e Europës, kjo në bazë të auditimeve dhe vlerësimeve të Komisionit të Licencimeve pranë Federatës Shqiptare të Futbollit.
“Komisioni i Licencimit të Klubeve, i mbledhur më 23 prill, pasi shqyrtoi të gjithë dokumentacionin, arrin në konkluzionin që t’u japë licencën për pjesëmarrje në kupat e Europës 6 skuadrave të Kategorisë Superiore. Përmend këtu Skënderbeun, Kukësin, Luftëtarin, Laçin, Partizanin dhe Teutën. Gjithashtu, të refuzojë për mosplotësim të kriterit financiar 4 klube të Superiores, praktikisht Flamurtarin, Vllazninë, Kamzën dhe Lushnjen”, tha Eduard Gjini, shef i Sektorit të Licencimeve.
Por, cilat janë kriteret që duhet të plotësojnë skuadrat e futbollit shqiptar për pjesëmarrjen në kupat e Europës, apo edhe në kategoritë e ndryshme të kampionatit vendas?
“Të gjitha klubet që marrin pjesë në të gjitha kompeticionet e organizuara nga UEFA dhe nga Federata Shqiptare e Futbollit, duhet të plotësojnë 5 kritere: atë sportiv, të infrastrukturës, atë të administratës së personelit, kriterin ligjor dhe atë financiar”, shpjegoi Eduard Gjini për Top channel.
Sipas Gjinit, problemet kryesore që kanë klubet shqiptare kanë të bëjnë me strukturën, teksa për në kupat e Europës duhet një personel administrativ i skuadrës me 12 persona, e kriteri më i rëndësishëm është ai financiar.
Jo të gjitha klubet e klasifikuara me bilanc pozitiv plotësojnë realisht kriteret financiare. Çuditërisht nga 4 klubet e skualifikuara, Vllaznia, Kamza, Lushnja dhe Flamurtari, 3 prej tyre administrohen nga Bashkitë dhe janë të detyruara të deklarojnë kontrata reale, ndërkohë që të njëjtën gjë bën edhe Flamurtari.
Me nivelin e shpenzimeve që kanë skuadrat shqiptare, e të ardhurat që janë thuajse zero, bilanci negativ është i pashmangshëm.
Ndërkohë, një pjesë e klubeve private, herë pas here manovrojnë me kontratat e tyre, duke prëfshirë një marrëveshje “xhentëllmenësh”, që jo gjithmonë njihet nga ligji.
a.ç
