Boksieri shqiptar Kristian Prenga ka ndezur entuziazmin e sportdashësve shqiptarë, pasi ka paralajmëruar përmes rrjeteve sociale një nga përballjet më të mëdha në historinë e sportit shqiptar. Më 25 korrik, në Riad të Arabisë Saudite, Prenga do të ngjitet në ring për t’u përballur me ish-kampionin e botës, Anthony Joshua, në një duel që pritet të tërheqë vëmendjen e gjithë botës së boksit.
Kjo sfidë konsiderohet si një moment historik jo vetëm për karrierën e Kristian Prengës, por edhe për sportin shqiptar . Vetë boksieri shqiptar është shprehur i bindur se kjo do të jetë nata që do të ndryshojë gjithçka.
“Anthony Joshua është një boksier i madh, por ka bërë një gabim të madh duke më zgjedhur mua si kundërshtar. Kjo është ndeshja që ndryshon gjithçka për mua dhe për të,” – është shprehur Prenga.
Pavarësisht emrit të madh që ka përballë, Prenga thekson se nuk ndihet aspak i nënvlerësuar. Përkundrazi, ai e sheh këtë situatë si një avantazh
“E di që kanë plane të mëdha pas kësaj ndeshjeje, e di që po më anashkalojnë dhe kjo më pëlqen. Do t’ua prish planet dhe do të trondis botën në korrik në Arabinë Saudite,” – deklaroi ai.
Kristian Prenga vjen në këtë duel me një rekord mbresëlënës prej 20 fitoresh dhe vetëm 1 humbje, ndërsa të gjitha fitoret i ka arritur me Knockout, një statistikë që e vendos mes goditësve më të frikshëm të peshave të rënda.
Përballja ndaj Anthony Joshua do të jetë testi më i madh i karrierës për boksierin shqiptar, por edhe një mundësi e artë për të hyrë në historinë e sportit botëror. Nëse arrin të surprizojë britanikun, Prenga jo vetëm që do të realizojë ëndrrën e tij, por do të shkruajë një kapitull të ri për sportin shqiptar.
Tashmë sytë e tifozëve shqiptarë dhe të botës së boksit janë drejtuar nga 25 korriku në Riad, aty ku Kristian Prenga synon të bëjë atë që pak kush e pret: të rrëzojë Anthony Joshua dhe të “trondisë” botën e boksit.
