Prej 1 jave Ilaria Sula rezultonte e zhdukur. Sot, prindërit e saj dhe vëllai morën vesh lajmin tronditës. Ajo është vrarë nga ish i dashuri i saj, një filipinas, që pasi kreu krimin, e futi trupin e 22-vjeçares në një valixhe dhe e hodhi në një zonë të pyllëzuar disa kilometra nga Roma.
Por si e morën vesh familjarët e saj këtë ngjarje?
Më 25 Mars, vajza e tyre, që studionte për Statistikë në Universitetin e La Sapienza-s, doli nga apartamenti ku jetonte me qira me disa shoqe, por nuk u kthye më. Të alarmuara, ato kanë njoftuar prindërit e të resë, të cilët menjëherë kanë denoncuar rastin në polici.
Familja e Ilaria Sulës kishte mbërritur në Itali nga zona e Lushnjes, për të nisur një jetë të re. Mamaja, G. Sula, punon si pastruese, ndërsa i ati, F. Sula në një kompani ndërtimi. Ata jetojnë në një shtëpi pranë stadiumit në Terni, bashkë me fëmijën e dytë, djalin 19-vjeçar L. Sula.
Pas zhdukjes së vajzës, mamaja e saj e kishte parandjerë se diçka e keqe kishte ndodhur.
“Menjëherë e kuptova se ishte diçka e keqe sepse ajo zakonisht bënte telefonata me video dhe nuk i përdorte mesazhet e thjeshta. Më pas fola me shoqet me të cilat jetonte dhe bashkë me burrin vendosëm ta denoncojmë menjëherë zhdukjen e saj. E di që hetimet çuan menjëherë te djali që Ilaria kishte lidhje në të shkuarën, por dimë shumë pak për të”, tregoi G. Sula, mamaja e viktimës.
Vëllai i Ilarias përpiqet t’i japë përgjigje kësaj ngjarje, por nuk mundet. Askush s’di ta shpjegojë pse ish i dashuri i motrës së tij kreu krimin makabër.
“Nuk mund ta shpjegojmë dot. Pse e bëri këtë? Nuk e kuptojmë pse e bëri, vetëm ai e di”, tha ai.
Ai rrëfeu edhe mesazhin e fundit me të motrën, ndërsa tregoi se ish të dashurin e saj e njihte, por sipas tij, ata ishin ndarë.
“Fola me Ilarian për herë të fundit para dy javësh sepse donte të na vizitonte në Terni. Ishte e qetë, nuk na tregoi për asnjë problem. Më pas vetëm mesazhe, por jam i sigurt që nuk i shkruante ajo. E njihja, ishin bashkë për 1 vit, por më pas u ndanë”, tha ai.
Kujtojmë se në lidhje me këtë ngjarje, Mark Antony Samson ka pranuar autorësinë e krimit.
