Sektori kundër krimit ekonomik në Policinë e Shtetit ka nisur verifikimet paraprake për gjyqtarin që firmosi pezullimin e gjyqtarit Arjan Aliaj. Aliaj akuzohet për veprën penale “Fshehjes së të ardhurave”, “Mosdeklarim të pasurisë”, “Evazion fiskal, “Pastrim parash” dhe “Korrupsion”.
Burime për Report TV bënë me dije se verifikimi ka nisur pas denoncimit të qytetarëve dhe deklaratës së bërë publike nga vetë gjyqtari. Sipas të njëjtave burime hetimet janë përqendruar në kontratën e shitjes së vilës tre katëshe të gjyqtarit Aliaj, jo vetëm për shkak të çmimit prej 10 milionë lekësh të vjetra, por edhe për faktin se motra e gjyqtarit, Etleva Galanxhi ka deklaruar jo atësinë e vërtetë, por e ka ndryshuar atë, nga Çerçiz në Çezar.
Vila tre katëshe e gjyqtarit Aliaj, ka qenë më parë pronë e vëllait të tij, më pas të motrës dhe se fundmi e bashkëshortes së gjyqtarit. Këto kalime pronësish, mes familjarëve të gjyqtarit kanë sjellë dyshime tek oficerët e Policisë së Shtetit, e cila ka nisur dhe hetimet me iniciativën e saj.
Aliaj në qendër të akuzave nga ministri i Brendshëm dhe njëkohësisht kryeministri Rama gjatë ditëve të fundit për shkak të firmës që ka dhënë për pezullimin e drejtorit të përgjithshëm të Policisë së Shtetit.
(Vila 3 katëshe e gjyqtarit Arjan Aliaj)
Etleva Galanxhi është bashkëshortja e Gilbert Galanxhit, deri para pak kohësh shef i Kabinetit të Prokurorit të Përgjithshëm, Adriatik Llalla.
