Këshilli i Ministrave miratoi sot ngritjen e Taskforcës pranë Ministrisë për Europën dhe Punët e Jashtme dhe të Njësisë pranë Misionit të Republikës së Shqipërisë pranë organizatave ndërkombëtare në Vjenë, përgjegjëse për kryesimin e grupit të Kontaktit të Mesdheut, Organizatës për Siguri dhe Bashkëpunim në Europë dhe Grupit të Kontaktit për Azinë.
Taskforca ka si qëllim drejtimin me sukses të gjithë procesit të kryesimit të OSBE-së, GKM-së dhe GKA-së, si dhe drejtimin, në emër të Kryetarit të Radhës, të gjithë veprimtarisë së kryesimit të OSBE-së, nëpërmjet koordinimit të punës me Misionin e Republikës së Shqipërisë pranë organizatave ndërkombëtare dhe ON në Vjenë.
Po ashtu, ndër objektivat e Taskforcës janë edhe: “Mbështetja e përfaqësimit të Republikës së Shqipërisë si Kryetare e Radhës në OSBE; mbikëqyrja e aktiviteteve të OSBE-së, që lidhen me parandalimin e konflikteve, administrimin e krizave dhe të situatave postkonflikt në hapësirën e OSBE-së; drejtimin dhe koordinimin e punës ndërmjet Ministrisë për Evropën dhe Punët e Jashtme (më poshtë MEPJ), institucionit të Presidentit të Republikës, Kuvendit dhe institucioneve të administratës shtetërore shqiptare për periudhën e kryesimit të OSBE-së, GKM-së dhe GKA-së”.
Taskforca duhet të evidetojë dhe përçojë vlerat më të mira të politikës së jashtme të Republikës së Shqipërisë në ruajtjen dhe forcimin e paqes e të sigurisë, nxitjen e bashkëpunimit ndërmjet vendeve dhe popujve në rajonet ku vepron OSBE-ja, në mbrojtje dhe respektim të të drejtave të njeriut.
Po ashtu, pranë Misionit të Republikës së Shqipërisë pranë Organizatave Ndërkombëtare në Vjenë krijohet njësia përgjegjëse për mbulimin e kryesimit të: Grupit të Kontaktit të Mesdheut (GKM), në vitin 2019; Organizatës për Siguri dhe Bashkëpunim në Europë (OSBE), në vitin 2020; dhe Grupit të Kontaktit për Azinë (GKA), në vitin 2021.
Për zbatimin e këtij vendimi, Ministrisë për Europën dhe Punët e Jashtme i shtohen 14 punonjës për Taskforcën dhe Njësinë e Misionit në Vjenë, duke e çuar numrin e përgjithshëm të punonjësve të ministrisë në 565 punonjës. Ky numër përballohet nga reduktimi në të njëjtën masë i numrit rezervë të punonjësve për vitin 2019.
