Komisioni i Ligjeve ka vijuar ditën e sotme procedurën për zgjedhjen e kreut të ri të Komisionit Qendror të Zgjedhjeve. Në mbledhjen e sotme u diskutuan e më pas votuan kandidaturat për këtë detyrë, vetëm me votat e mazhorancës, pasi deputetët e PD nuk ishin të pranishëm.
Në fillim të mbledhjes, kreu i Komisionit Fatmira Xhafaj, paraqiti edhe 5 kandidatët për kreun e KQZ: Denar Biba, Koli Bele, Lefterie Luzi, Anton Lleshaj dhe Rozeta Ivanova. Në mbledhjen e sotme u votua për 4 emra nga 5 kandidatura që ishin, pasi u skualifikua Anton Lleshaj.Vetëm dy orë më pas, në bazë të procedurës, opozita i ka skualifikuar dy emra, përkatësisht Lefterie Luzi dhe Rozeta Ivanova.
Pas vendimit të opozitës, do t’i kalojnë Parlamentit dy emrat e mbetur, Koli Bele dhe Denar Biba, të cilët do të votohen në seancën plenare të së enjtes.Pas shqyrtimit të dy kandidaturave, Kuvendi do të votojë kreun e ri të Komisionit Qendror të Zgjedhjeve.
ma.me
