Lideri mysliman në Bosnjë Hercegovinë, Husein Kavazoviç, ka kërkuar mbrojtje nga autoritetet, pasi është kërcënuar nga një pjesëtar i dyshuar i grupit militant, Shteti Islamik, për shkak se e ka denoncuar ekstremizmin islamik. “Ne shpresojmë se institucionet shtetërore do ta kenë parasysh këtë çështje”, thuhet në deklaratën e Zyrës së Kavazoviçit, transmeton REL.
Kjo thirrje për mbrojtje u bë pasi mediat në Bosnjë Hercegovinë kanë transmetuar një video ku një person, para një flamuri të IS-it, në gjuhën boshnjake i është kërcënuar Kavazoviçit me “prerje të qafës”. Sipas Transmetuesit publik, FTV, ky person është myslimani nga Bosnja, Amir Selimoviç, i cili i është bashkuar grupit militant, Shteti Islamik, në Siri në vitin 2014.
Ministri i sigurisë së Bosnjës, Dragan Mektiç, tha se kërcënimi ishte “serioz” dhe se shteti po ndërmerr “masa shtesë të sigurisë” për mbrojtjen e myftiut Kavazoviç.
