Deputetja e Partisë Socialiste, Ermonela Felaj gjatë një interviste në studion e Agjencisë Telegrafike Shqiptare u shpreh se nga drejtësia e re duhet të kenë frikë të gjithë ata zyrtarë që kanë shkelur ligjin, teksa sa i takon protestës së opozitës, Felaj bëri thirrje për qetësi, pasi çdo formë e dhunës do dënohet sipas ligjit.
“Mbas më shumë se dy vitesh nga votimi i Reformës në Drejtësi në Kuvend, tashmë kemi hyrë në një fazë tejet të rëndësishme, kemi të krijuar qeveritë e gjyqtarëve KLGJ, dhe atë Prokurorëve KLP. Kemi dhe KED, Këshillin e Emërimeve në Drejtësi, që pritet të bëjë emërimet në seksionet e larta të drejtësisë, Gjykatën Kushtetuese etj.”, – tha Felaj.
“Procesi i Vetingut është thelbi, apo ‘thembra e Akilit’ në Drejtësi. Pa Veting nuk do merrnim atë produktin që dëshironin qytetarët prej kësaj reforme. Ky ishte një proces i domosdoshëm për të larguar të korruptuarit nga gjykatat dhe prokuroritë, për të larguar pra, figurat që janë larguar nga drejtësia”, – tha Felaj.
Sipas deputetes së PS ka pasur tentativa konkrete për të bllokuar këtë reformë. “Për fat të keq nuk janë thjesht tentativa, pasojat janë ndjerë. Ka pasur pengesa konkrete, kujtoj se kur do duhej të zgjidhnim trupën e Vetingut opozita u fut në çadër dhe afatet u shtynë dhe nuk nisën në kohën e duhur”, – tha Felaj.
“Pengesat vijojnë, shtoi Felaj, kërkesat për ngritjen e komisionit hetimor për ministrin e Jashtëm, është një kërkesë që vonon sërish afatet, pasi komisioni që jep certifikatën e sigurisë preket nga Vetingu dhe pra, puna e këtij Komisioni është një mënyrë për të vonuar procesin”, – tha Felaj.
Sipas saj, me sjelljen e saj PD kërkon ta imponojë Reformën në Drejtësi. “Por trupa e KLP, KLGJ apo e Vetingut janë trupë e pavarur dhe vijojnë normalisht punën e tyre. Gjykata Kushtetuese dhe ajo e Lartë janë në rrugën e duhur për tu plotësuar, kandidatët duhet të kalojnë Vetingun dhe sipas procedurave do të vijojë puna për tu plotësuar këto vende vakante”, – tha Felaj.
Ajo shtoi se kush shkel ligjin duhet të ketë frikë nga drejtësia. “Reforma në Drejtësi dhe krijimi i SPAK e BKH është lajm i mirë për zbatimin e ligjit. Pasi çdo zyrtar që ka shkelur ligjin duhet të ketë frikë nga pasojat e shkeljes së ligjit”.
“Çështja Dajti? Gjyqtarët abuzuan me një nga pikat që ka gjykimi si proces, me atë të gjykimit të shkurtuar, por ky i pandehur ka përfunduar gjykimin dhe është marrë një vendim dhe ekonomizimi i çështjes dhe procesit të gjykimit nuk ka sens. Përgjegjësit e këtij abuzimi duhet të dalin dhe të mbajnë përgjegjësi penale e disiplinore”, – tha Felaj.
Lidhur me protestën e opozitës, Felaj shtoi se skenat e dhunës do dënohen sipas ligjit. “Opozita po përpiqet që pjesë të kësaj proteste të bëjë dhe persona që mund të kenë veprime të dhunshme. Qytetarët e thjeshtë janë në të drejtën e tyre të protestojnë, por qytetarët e thjeshtë kur protestojnë, nuk dhunojnë. I bëj thirrje Policisë, të zbatojë ligjin e të marrë masa të dënojë këdo që ushtron dhunë. Dhunën e presim nga ajo strukturë që po tenton të mobilozojë, kushdo që përpiqet të ushtrojë dhunë do marrë përgjigjen sipas ligjit”, – tha Felaj.
“Në pushtet nuk vihet me rrugë të shkurtra, por me votë. As me destabiliet nuk vihet në pushtet. Të gjitha protestat kanë pasur një skenar, kjo është ndryshe, se ka marrë më shumë kohë për ta përgatitur. Por qytetarët nuk duken të irrituar ndaj qeverisë, pasi s’e shpjegoj dot që njerëzit jetojnë normalisht dhe opozita kërkon që kjo protestë të dalë dhe të krijojë destabilitet”, shtoi Felaj.
/a.rada
