Kreu i Këshillit të Lartë të Prokurorisë, Gent Ibrahimi, i pranishëm në punimet e Këshillit Kombëtar të Integrimit, që u zhvillua në Tiranë, theksoi se Këshilli që ai drejton është duke punuar intensivisht për përmbushjen e detyrave ligjore dhe në këtë kuadër ngritja e Prokurorisë Speciale do të realizohet shumë shpejt.
“Kemi katër muaj që kemi nisur punën, më 17 dhjetor 2018”, tha Ibrahimi në çelje të fjalës së tij. “Intensiteti i punës ka qenë i madh. Kemi punuar për organizmin e brendshëm, duke përdorur me efikasitet burimet njerëzore”, tha Ibrahimi duke shtuar se kushtet për objektivat afatgjata lidhen me garantimin e prurjeve cilësore në prokurori. “Këtë vit nga shkolla e Magjistraturës, janë 190 kandidatë për prokurorë. Kemi bërë një vlerësim paraprak, pasi nga këta 190 kandidatë do të përzgjidhen 25 fitues, çka është më e rëndësishme është që verifikimet e tyre të bëhet përpara se të hyjnë në sistem”, tha Ibrahimi.
“Pika e dytë është vlerësimi i performancës së prokurorëve. Është gjithashtu detyra jonë meritokracia për menaxhimin e karrierave të prokurorëve, një sistem i cili bën të mundur që prokurorët më të mirë të alokohen në pozicionet e karrierës. Kjo krijon një emulacion pozitiv dhe rrit cilësinë e shërbimeve ndaj qytetarit”, tha Ibrahimi.
“Komponenti i fundit është përgjegjshmëria në radhët e prokurorisë. Ligji na jep mundësi të marrim vendime për të dekurajuar përmes masave disiplinore shkeljet e prokurorëve. Në këtë pikë futet dhe Inspektori i Lartë i Drejtësisë, që pritet të ngrihet nga KED”, vijoi Ibrahimi.
“Fronti i tretë i punës sonë është përzgjedhja e kandidatëve dhe vlerësimi i tyre për krijimin e SPAK dhe Prokurorit të Përgjithshëm. Natyrisht, shtoi Ibrahimi, këto janë vetëm aktet finale, por që të vijmë deri në këtë pikë, krijimi i SPAK lipset faza përgatitore, rregullatore, që e kemi kryer tashmë. Është një rregullore që synon të vlerësojë kandidatët për nga profesionalizmi dhe integriteti. Ka filluar faza e verifikimeve. Dje Këshilli thirri kandidatët, pas verifikimit të parë kemi tanimë 25 kandidatë nga 28 në total. 25 kandidatët erdhën dje dhe u informuan mbi rregulloren dhe tashmë presim dokumentacionin nga fillimi i javës së ardhshme dhe pas kësaj do t’i japim Shqipërisë SPAK-un”, tha Ibrahimi.
“E njëjta situatë është dhe me Prokurorin e Përgjithshëm. Aktualisht prej 1 viti e gjysëm Shqipëria drejtohet nga një prokurore e përkohshme. Kemi shpallur garën dhe presim kandidaturat”, përfundoi kreu i KLP-së, Gent Ibrahimi.
/a.rada
