Drejtori i CIA-s, John Ratcliffe, është takuar me homologun e tij kuban në Ministrinë e Brendshme në Havanë, pasi SHBA rinovoi ofertën prej 100 milionë dollarësh ndihmë për të lehtësuar efektet e bllokadës së naftës ndaj vendit.
Kuba tha përmes një deklarate se takimi ishte një përpjekje për të përmirësuar dialogun dhe se zyrtarëve amerikanë iu tha se Havana nuk përbën kërcënim për sigurinë kombëtare të SHBA-së.
Një zyrtar i CIA-s i tha CBS News, se SHBA-ja është “e gatshme të angazhohet seriozisht për çështjet ekonomike dhe të sigurisë, por vetëm nëse Kuba bën ndryshime themelore”, shkruan A2CNN.
Mungesat e karburantit, të përkeqësuara nga bllokada amerikane e naftës ndaj vendit, kanë bërë që spitalet të mos funksionojnë normalisht dhe kanë detyruar mbylljen e shkollave dhe zyrave qeveritare.
Veçmas, presidenti kuban Miguel Díaz-Canel tha se, në vend që të ofronte ndihmë, kushtet mund të përmirësoheshin më shpejt nëse SHBA do të hiqte bllokadën ndaj Kubës.
Sipas zyrtarit të CIA-s, në takim morën pjesë edhe Raúl Rodríguez Castro, nipi i ish-presidentit Raúl Castro, ministri i Brendshëm Lázaro Álvarez Casas, si edhe drejtuesi i shërbimeve sekrete kubaneze.
Delegacioni u takua “për të përcjellë personalisht mesazhin e Presidentit Trump”, tha zyrtari i CIA-s. “Gjatë takimit, drejtori Ratcliffe dhe zyrtarët kubanë diskutuan për bashkëpunimin në fushën e inteligjencës, stabilitetin ekonomik dhe çështjet e sigurisë, të gjitha në sfondin se Kuba nuk mund të jetë më një strehë e sigurt për kundërshtarët në Hemisferën Perëndimore”, shtoi zyrtari.
Deklarata kubaneze tha: “Të dyja palët nënvizuan gjithashtu interesin për zhvillimin e bashkëpunimit dypalësh mes agjencive të zbatimit të ligjit në interes të sigurisë së të dy vendeve, si dhe të sigurisë rajonale dhe ndërkombëtare.”
Cuba dhe SHBA pranuan më herët këtë vit se ishin në bisedime, por negociatat duket se ngecën ndërsa bllokada e naftës vazhdonte.
