Të gjithë kryeqytetasit e pastrehë, që kanë dorëzuar dokumentet për të përfituar kredi të butë nga Bashkia e Tiranës, duhet të riaplikojnë me formularin e ri, nëse duan që ai të pranohet në shqyrtim. Në fakt, nuk bëhet fjalë vetëm për ata qytetarë, dokumentet e të cilëve kanë tejkaluar vlefshmërinë ligjore të tre muajve të fundit, por edhe të tjerë që deri vonë kanë plotësuar formularin sipas programit të vjetër të strehimit.
Gazeta disponon formularin e ri të aplikimit, “Për subvencionimin e kredisë për apartament”, të cilin do të duhet ta plotësojnë të gjithë pa përjashtim. Afati për ta bërë këtë është më pak se një muaj, pasi në fillimin e muajit qershor, pas shqyrtimit të dosjeve, komisioni i strehimit do të dërgojë për miratim në Këshillin Bashkiak emrat e një mijë përfituesve. Banka lëvron deri në 80% të shumës totale të apartamentit në varësi të kërkesës që ka bërë përfituesi, i cili duhet të paguajë këstet mujore me interes 3%, ndërsa pjesën tjetër të interesave e mbulon bashkia.
95 milionë lekë është vlera e financimit që bashkia ka parashikuar për subvencionimin e interesave të kredisë për shtëpi për të paktën një mijë familje me të ardhura mesatare që, në kushtet e tregut të lirë, nuk e sigurojnë dot.
APLIKIMI
Ata që deri dje kanë dorëzuar dokumentet e kërkuara pranë bashkisë apo njësive administrative, kanë aplikuar përmes programit të vjetër për të përfituar “Banesa me kosto të ulët”, dhe jo atë “për subvencionimin e interesave të kredisë”. Janë dy programe të ngjashme, por jo e njëjta gjë. Me caktimin e bankës që fitoi të drejtën e lëvrimit të fondeve me qëllim blerjen e apartamenteve, Bashkia ka hartuar edhe formatin e kërkesë- aplikimit, i vlefshëm për programin aktual të strehimit.
Kështu, të gjithë aplikuesit duhet të drejtohen pranë një- sive administrative dhe Bashkisë së Tiranës për të plotësuar formularin e ri. Aplikuesit e hershëm, që mund të kenë ndryshuar statusin civil, nivelin e pagës, duhet të interesohen pranë njësisë bashkiake për të plotësuar dosjen e rifreskuar.
ZGJEDHJA E FITUESVE
Janë katër komponentë: kushtet e strehimit, ato familjare, sociale dhe ekonomike që do të përcaktojnë fituesit bazuar në një sistem pikëzimi që përllogarit maksimalisht 100 pikë. Kështu, konditat ekonomike të një familjeje kanë peshën më të madhe, me 30 pikë, më pas janë kushtet familjare. Gjysmën e pikëve e marrin automatikisht çiftet e reja, ndërsa nuk janë lënë jashtë vëmendjes familjet një- prindërore, ato që kanë në përbërje një person me aftësi të kufizuar dhe ato me shumë fëmijë, që vlerësohen me nga 3-5 pikë.
Me nga 22 dhe 20 pikë vlerësohen përkatësisht kushtet sociale (persona me aftësi të kufizuara, jetimë, emigrantë, viktima të dhunës në familje, apo fëmijë të policëve të rënë në detyrë), si dhe kushtet e strehimit (bëhet fjalë për banesa në rrezik shembjeje, të mbipopulluara, të prekura nga fatkeqësitë).
Kështu, bazuar në tabelën përbri shkrimit, çdo aplikant mund të përllogarisë vetëm sasinë e pikëve në garë për të qenë përfitues nga ky program. Procesi i përzgjedhjes finalizohet me zbardhjen e procesverbalit me pikët për çdo aplikant, që i shkon Drejtorisë së Përgjithshme të Shërbimeve Sociale në bashki, e cila harton listën e fituesve, që i shkon këshillit. panorama
