Një mundësi e dytë për të gjithë ata që aplikuan për kredi të butë për shtëpi pranë Bashkisë së Tiranës, por u s’kualifikuan për shkak të mangësive në dokumentacion.
Këtë e bëri me dije ministri i Ekonomisë, Blendi Gonxhja një ditë më parë teksa lajmëroi miratimin e 1200 kredive të buta nga Këshilli Bashkiak i Tiranës.
“Miratohet kredia e butë për 1200 qytetarë të Tiranës. Familjet dhe qytetarët e shpallur fitues, pas vendimit të Këshillit Bashkiak të Tiranës, do të përfitojnë mbështetje financiare nga MEKI gjatë gjithë kohëzgjatjes së kredisë. Lajm i mirë: MEKI po planifikon fonde të reja për një raund të ri aplikimi, që do t’u japë një mundësi tjetër edhe atyre që nuk u përfshinë këtë herë për shkak të dokumentacionit. Mbështetja vazhdon! Strehimi Social është një prioritet”, shkruan ministri përgjegjës ndër të tjera edhe për strehimin.
Për të përfituar kredi të butë për blerjen e një apartamenti në Tiranë aplikuan 2337 individë, nga të cilët u përzgjodhën gjysma e tyre si përfitues. Pjesa tjetër rezultojnë të pastrehë, ndonëse janë në marrëdhënie pune, pasi e kanë të pamundur të sigurojnë një apartament të tyrin në tregun e lirë të pronave. Sigurisht, nevoja për strehim në kryeqytetin, i cili mban thuajse gjysmën e popullsisë së gjithë vendit është shumë herë më e madhe se kaq. Për këtë arsye, ministria ka gati plane të tjera strehimi përveç kredive të buta si: bonuset e qirasë, banesa me kosto të ulët apo qendra strehimi për kategori të caktuara.
FONDET E STREHIMIT
Pak javë më parë, ministri i Ekonomisë ka folur për një rritje ose shumëfishim të fondeve në dispozicion të programit kombëtar, duke vënë në dukje se prioritet financimi nga buxheti i shtetit do të kenë bashkitë që kanë më pak mundësi financiare.
“Po punojmë që të vlera e strehimit të arrijë nga 8 milionë euro programin, në afro 75 deri 80 milionë euro në vit, ta 10- fishojmë. Nga kredi me interesa zero, banesa sociale, kredi me interesa shumë të ulëta etj. Reforma e strehimit social do rimodelohet për të qenë proporcional në mënyrë që t’u japim fonde me shumë bashkive që nuk kanë mundësi por të ndihmojmë edhe të tjerat”, tha ministri Blendi Gonxhja. Problem i pazgjidhur mbetet vjelja e taksës 3% që ndërtuesit duhet të paguajnë si kontribut për strehimin social. Ministri Blendi Gonxhja tha se kjo taksë nuk do të ndryshojë edhe pse ndërtuesit prej vitesh kërkojnë shfuqizim të saj.
“Sa i takon taksës 3% për ndërtuesit ende nuk kemi një inventarizim të pritshmërive që duhet të ishin arkëtuar qoftë të metrave katrorë dhe të vlerave të përfituara nga 3% i strehimit social. Por nuk do të tërhiqemi nga kjo skemë 3%, vetëm nëse ka ndonjë vendim gjykate”, tha Gonxhja.
Deri në vitin 2030 qeveria synon që nga programet e strehimit të përfitojnë 50 mijë familje, ndërsa deri më tani numri i familjeve që kanë përfituar nga programet e strehimit arrin në 35 mijë. Për vitin 2025 për programin e “Strehimit social” kanë aplikuar 43 bashki për 55 projekte, ndërsa fituesit do të shpallen brenda pak ditësh. Janë 6 programe që financohen si, banesa sociale me qira, kredi me kosto të ulët, përmirësimi i banesave, zhvillimi i zonave për strehim, strehim i përkohshëm dhe programi për ata me aftësi të kufizuar. Gjithashtu, për vitin 2025 Ministria Ekonomisë Kulturës dhe Inovacionit hapi thirrjen për 530 kuota të reja për t’iu ardhur në ndihmë 530 familjeve apo të rinjve e të rejave të cilët punojnë me përkushtim në administratën publike.
KREDITE E BUTA
Bashkia e Tiranës miratoi këtë të hënë rreth 1200 kredi të buta për familjet dhe çiftet e reja që nuk kanë mundësi të blejnë një banesë sipas kushteve të tregut. Ky vendim vjen si pjesë e një programi strehimi që synon të mbështesë qytetarët me të ardhura të ulëta ose të mesme. Sipas të dhënave zyrtare, deri më tani janë dhënë 3651 kredi të buta, ndërsa me miratimin e fundit ky numër rritet ndjeshëm.
Përfituesit përfshijnë familje të reja, çifte të sapomartuara dhe individë që kanë nevojë për mbështetje për të siguruar një strehë të qëndrueshme. Përveç kredive të buta, bashkia ka shpërndarë 2057 bonuse strehimi dhe ka vënë në dispozicion 419 banesa sociale me qira për familjet që nuk kanë mundësi të tjera strehimi.
Masat e strehimit janë pjesë e një pakete më të gjerë sociale, e cila përfshin gjithashtu abonenë falas në transportin publik për pensionistët dhe studentët, si dhe subvencionimin e 50% të tarifës së konviktit për studentët që studiojnë larg shtëpisë.
