Komisioni Qendror i Zgjedhjeve, në mbledhjen e ditës së sotme shpalli rezultatin përfundimtar të zgjedhjeve të pjesshme për Kryetarin e Bashkisë Dibër, Qarku Dibër, që u mbajtën më datë 11 Shtator 2016.
KQZ vendosi të shpallë rezultatin e zgjedhjeve për Kryetarin e Bashkisë Dibër, duke shpallur fitues Muharem Qamil Rama, kandidat i propozuar nga koalicioni “Aleanca për Shqipërinë Europiane”.
Por për PD-në, vendimarrja e sotme vendos vulën përfundimtare në farsën zgjedhore që u luajt në Dibër, raporton panorama.
“Fatkeqësisht Dibra konfirmoi në një shkallë të paprecedentë më parë, nëpërmjet dhjetëra rastesh të faktuara e të denoncuara publikisht nga mediat, nga Partia Demokratike, nga qytetarë e madje dhe nga vetë rezultati përfundimtar, se qeveria Rama nuk është në gjendje të sigurojë një garë elektorale sipas standardeve demokratike më elementare”.
“Të gjithë e panë qartë se në Dibër nuk pati zgjedhje, por betejë me krimin të bërë njësh me pushtetin.
Makineria e pushtetit funksionoi me të gjithë peshën dhe ingranazhet e saj jo vetëm për të siguruar fitoren e kandidatit të majtë në këto zgjedhje, por për të perfeksionuar skemën që synon të përdorë në 2017, për të vjedhur dhe manipuluar dhe ato zgjedhje.
Përsëritja e vazhduar e këtyre fenomeneve elektorale, paralelisht me kriminalizimin e qeverisjes dhe të proçesit zgjedhor, në veçanti në zonat rurale të vendit, kërkon në mënyrë urgjente marrjen e masave rrënjësore për organizimin e zgjedhjeve të lira e demokratike në Shqipëri”, tha PD./a.k
