KQZ njeh Lulzim Bashën si kryetar të Partisë Demokratike dhe kjo buron nga regjistri i partive politike në Gjykatën e Tiranës.
Në argumentimin e tij ligjor, pasi u njoh me pretendimet e palëve, Ilirjan Celibashi tha se Lulzim Basha është i vetmi person që mund të regjistrojë Partinë Demokratike në zgjedhjet e 14 Majit.
Nga ana tjetër, Celibashi ka kthyer për plotësim dokumentacioni kërkesën e grupimit të Alibeajt duke u shprehur se përgjegjesia për t’u regjistruar në zgjedhje nuk mund të delegohet. Kështu, kërksa për regjistrimin e PD në zgjedhje duhet të paraqitet me firmën e Lulzim Bashës brenda 48 orëve në vijim.
“Nuk është KQZ që vendos se kush është kryetari i një partie. Dikush nga ju thotë e vendos anëtarësia, dikush një tjetër. Por në fakt ligji e përcakton se është Gjykata që e përcakton se kush është përfaqësuesi i një partie politike.
Kjo është e qartë dhe regjistri i partive politike gjendet në Gjykatën e Rrethit Gjyqësor Tiranë. Aty shënohet emri i plotë i partisë, inicialet dhe emri i kryetarit. Ky është dokumenti zyrtar që tregon se një parti politike është e regjistruar dhe kush është drejtuesi i saj.
Anëtarësia e partisë mund të njohë për drejtues këdo që ata çmojnë, por për ligjin dhe KQZ merret në referencë dokumenti zyrtar. Do të ishte shumë e demshme nëse KQZ do ta merrte këtë vendim mbi perceptime dhe fakte publike për aq kohë sa ka një dokument zyrtar që vërteton faktin e caktuar.
Unë mund ta pranoj që z. Sali Berisha është kryetar i PD, por kjo nuk vendos asgjë në përmbushje të ligjit. Pra mendoj se të drejtën për të kërkuar regjitrimin në zgjedhjet e 14 Majit e ka zoti Lulzim Basha” – tha Ilirjan Celibashi.
/javanews/a.r
