Sërish probleme në seancën parlamentare në Kosovë, ku kësaj here eksponentë të opozitës kanë hedhur gaz lotësjellës në aulën e parlamentit.
Deputetja e AAK, Donika Kadaj Bujupi e ka pranuar publikisht se ajo ka qenë njëra ndër personat që kanë hedhur gaz lotësjellës në aulën e parlamentit.
“Unë po, kam hedhur gaz lotsjellës. Kam hedhur sepse nuk na kanë lënë rrugë tjetër. Qeveria është përgjegjëse për të gjetur zgjidhje. Ne ju kemi treguar se si bëhet zgjidhja. S’ka kuptim te vazhdohet me seanca, pa ju dhënë zgjidhje marrëveshjeve”- ka thënë deputetja.
Ndërkohë që deputeti i Lëvizjes Vetëvendosja Faton Topalli ka pranuar se ka qenë njëri ndër personat e caktuar me detyrë për të hedhur gaz lotësjellës. Madje deputeti ka shtuar se po ashtu detyrë e tij ka qenë edhe futja e bombolave të gazit brenda ambienteve të kuvendit.
“Atë pjesë të detyrës që unë e kam pasur e kam kryer. Kam hedhur dy bombola gazi dhe nëse vazhdon kështu, numri i tyre mund të shtohet”, tha Topalli.
Kreu i grupit parlametar të Vetëvendosjes Glauk Konjufca, tha se për futjen e gazit lotësjellës në ambientet e parlamentit ka ndihmuar policia, një argument ky i cili u kundërshtua kategoriskisht nga këta të fundit.
Pas këtyre ngarjeve kreu i kuvendit Kadri Veseli ka pezulluar punimet e parlamentit.
