Në pikë kalimet kufitare me Serbinë, në Merdarë dhe Mutivodë, ka fluks të madh të automjeteve, ku pritjet në dalje zgjasin 4 deri në 5 orë.
Si pasojë e pritjeve të gjata, janë shkaktuar radhë deri në dy kilometra, transmeton KosovaPress.
Zëdhënësi i Policisë së Kosovës, Daut Hoxha, në një përgjigje elektronike për KosovaPress, tha se në vazhdimësi kanë kërkuar nga pala serbe, që të gjenden modalitetet për procedura më të shpejta të kalimit kufitar, që të mundësohet një qarkullim sa më i rrjedhshëm, pa pritje dhe pa radhë edhe nga ana tyre.
Sipas tij, në hyrje nuk ka radhë në këto pikë kalime kufitare, ku si në Merdarë ashtu edhe në Mutivodë, pritjet në hyrje janë 5 deri në 10 minuta.
“Policia e Kosovës pavarësisht prej nevojave dhe rritjes së fluksit, ndërmerr edhe masa konkrete për rritjen e kapaciteteve me personel, si dhe aplikim të procedurave të përshpejtuara të kalimit”, thekson Hoxha.
Në tabelën me të dhëna për pritjet në pikë kalimet kufitare, vihet re se po thuajse në të gjitha pikat, pritjet në hyrje janë më të pakta, krahasuar me ato në dalje./KosovaPress/r.a