Me shpresë që një ditë do të përballen me ata që ua vranë familjarët gjatë kohës së luftës në Kosovë, sot u dorëzuan më shumë se 150 kallëzime penale në Prokurorinë Speciale. Në një bisedë për Gazetën Express përfaqësuesja e grupit Mevlyde Saraçi, ka treguar se në mesin e kriminelëve serbë, ka edhe shqiptarë që bashkëpunuan për kryerjen e krimeve e terrorit ndaj shqiptarëve. Madje, disa prej tyre ende jetojnë në Kosovë.
Përveç dëshmive të shkruara, familjarët kanë treguar dokumente, fotografi të personave të vrarë dhe kriminelëve, fakte, emrat e kriminelëve të cilët thonë se i njohin, se kanë kryer vrasjet gjatë kohës së luftës në Kosovë. Madje, në mesin e kriminelëve serbë, ka edhe shqiptarë që kanë vrarë shqiptarë. Të gjitha këto dëshmi, tanimë janë në dorë të Prokurorisë Speciale.
Që nga paslufta Gjakova ka dorëzuar pesë kontingjente të kallëzimeve penale në organet kompetente për krimet e luftës. Kështu ndodhi edhe të mërkurën, kur Grupi i Shoqërisë Civile ka grumbulluar dëshmi për krime të luftës dhe i dorëzoi më shumë se 150 kallëzime penale në Prokurori Speciale. Mevlyde Saraçi, përfaqësuesja e Grupit të Shoqërisë Civile, në një bisedë për Gazetën Express ka thënë se në mesin e kriminelëve serbë, ka edhe emra shqiptarë që kanë kryer krime ndaj shqiptarëve. Dorëzimi i kallëzimeve penale ka filluar që nga shkarkimi i ish-ministrit serb në Kosovë, Aleksandar Jabllanoviq.
“Ne edhe 16 organizata joqeveritare kemi mbledhë çdo ditë dëshmi nga familjarët e viktimave. Familjarët e viktimave kanë sjell fotografi, dëshmi dhe shumë fakte rreth krimeve të asaj kohe”, tha Saraçi. Ajo gjithashtu tregoi se familjarët e viktimave kanë treguar se kriminelët që i kryen këto vepra, kanë jetuar në mesin e tyre, madje, i kanë pasur fqinjë.
“Dua të përmend që ka edhe bashkëpunëtorë shqipfolës të kriminelëve serbë, të cilët kanë qenë policë lokalë, i kemi edhe ata me emra e mbiemra. Të gjithë ata, janë të identifikuar dhe kanë bërë krime të rënda. Të gjithë këta emra janë dorëzuar në prokurorinë Speciale, por jemi të kufizuar t’i përmendin publikisht për shkak të hetimeve”, ka thënë Saraçi për Gazetën Express. (b.an)
