Një grup azilkërkuesish shqiptarë tentuan të ndalnin dhunën seksuale, që një grup emigrantësh nga vendet arabe ushtruan ndaj femrave në festën e ndërrimit të viteve në qendër të Këlnit. Këtë e ka rrëfyer një azilkërkues kosovar për të përditshmen hollandeze De Telegraaf, një prej gazetave më të mëdha në Hollandë.
Një kosovar rrëfen për gazetën hollandeze se atë natë kishte shkuar për të parë spektaklin e fishekzjarreve në sheshin pranë katedrales së Këlnit sëbashku me 4 azilkërkues të tjerë. Por pamjen e parë me të cilën u përballën, ai e përshkruan si shokuese. Një grup sirianësh sulmuan 3 vajza pranë stacionit qëndror të trenit. I qëlluan me shishe pijesh alkolike. U morën çantat e telefonat celularë. 3 sirianë të tjerë kishin kapur një vajzë në një cep jashtë katedrales, e kishin zhveshur dhe i kishin marrë rrobat. 22-vjeçari kosovar thotë se bashkë me shokët e tij kishin ndërhyrë për të ndihmuar vajzën, e cila bërtiste duke kërkuar ndihmë. Por agresorët sirianë i kishin kërcënuar se do i vrisnin duke u drejtuar shishet e thyera të alkoolit që mbanin në duar.
Leotrimi shprehet për gazetën hollandeze se që agresorët ishin sirianë, ai i kishte dalluar nga mënyra e të folurit, pasi në kampin ku ai strehohej kishte shumë sirianë. Është një ngjarje e përsëritur – shprehet azilanti kosovar 22-vjeçar. Çdo të premte dhe të shtunë, refugjatë e emigrantë marokenë, algjerianë e sirianë të strehuar në kampet e ngritura në zona të ndryshme të Këlnit, vjedhin shishe me pije alkoolike nëpër dyqane dhe zbresin në qendër të dehur për të marrë pjesë në festa. Është një ritual i përjavshëm thotë ai.
Sipas tij, policia gjermane e ka shumë të vështirë t’i zbulojë autorët e këtyre akteve, pasi ata janë të shumtë e mbajnë identitete të rreme. Shumica kanë pasaporta siriane por vijnë nga vendet e Afrikës Veriore.
