Kosova renditet si vendi më i lumtur në rajon, ndërsa në rang global listohet e 29-ta në raportin e ri botëror të lumturisë. Por cilat janë arsyet që i bëjnë kosovarët njerëz të lumtur?
Qytetarët mendojnë se Kosova duke qenë në robëri ka vuajtur shumë, dhe tani e di vlerën e lirisë dhe e shijon atë.
“Për shkak të vuajtjeve me shekuj mbrapa, kënaqemi më pak, e kjo liri nuk është pak, nuk nënkupton që është pak, po ndjejmë e shijojmë në masë të madhe për shkak të vuajtjeve. Por vetëkënaqësia nuk duhet dominuar, për shkak se e ardhmja ka sfida të reja, kështu që ne duhet të jemi të përgatitur edhe për ato sfida. Gjithmonë kur je i kënaqur edhe sfidat i kalon më lehtë”, tha Buja.
“Unë mendoj se një popull i cili ka qenë me shekuj i robëruar, ika ardhur liria sot, e ndien atë kënaqësinë, e shpreh edhe jep vullnet për rininë për të ardhmen, si popull një perspektivë në Ballkan, prandaj jem si popull të lumtur dhe entuziastë për jetën”, tha Breznica.
Por qytetarë tjerë shrehen të habitur me renditjen e Kosovës në raport, duke konsideruar situatën në vend, përhapjen e krimit dhe dhunës në familje.
“Sipas gjithë kësaj situate që ekziston në Kosovë, vrasje, krime, dhunë në familje, populli më i lumtur, nuk kam koment. Po çuditem!”, tha Thaçi.
Në raportin botëror të lumturisë Shqipëria renditet e 89 mes 147 vendeve të përfshira, ndërsa Finlanda prin klasifikimin si shteti më i lumtur, për të tetin vit radhazi.
Në një prononcim për Kosova Press, ambasadori i Finlandës Matti Nissinen thotë se sekreti për mirëqenien mendore të popullit të tij, ka të bëjë me stabilitetin, barazinë dhe besimin.
Ai ka edhe një porosi për përmirësimin e jetesës dhe rrjedhimisht lumturisë në shtetin e Kosovës.
“Ishte shumë kënaqësi të vërej se Kosova ka shënuar përparim këtë vit, prandaj përgëzime për këtë. Është një arritje e shkëlqyer, e shkëlqyer. Mendoj se duhet të investohet te njerëzit, të investohet në arsim, në shëndetësi, në sigurime shoqërore dhe të gjitha ato elemente që krijojnë ndjesi sigurie për njerëzit, që ata të dinë se nuk janë vetëm, por shoqëria do të jetë aty për ta. Dhe mendoj se në këtë moment të turbullt të botës gjeopolitike dhe ekonomike që po jetojmë, ky stabilitet sjell gjithashtu qëndrueshmëri shoqërore, e cila është shumë e rëndësishme”, tha Matti Nissinen.
